🙏 ഈശ്വരൻ🙏

രചന : കൃഷ്ണമോഹൻ കെ പി ✍

🌿 ഒരു സങ്കല്പമോ, സത്യമോ, അതോ മിഥ്യയോ!!!🌿
ഇഹത്തിലും പരത്തിലും അനശ്വരനായി നിന്ന്
ഇമകളാൽ കാലത്തെയും നയിക്കുന്നവൻ
ഇഹലോകവാസികളെ,അഹങ്കാരമുക്തരാക്കാൻ
ഇളകാതെയിരിയ്ക്കുന്ന, ബ്രഹ്മതത്വം താൻ
ഉളവാകുമഹന്തയെ , ഉന്മൂലനം ചെയ് വതിന്നായ്
ഉടലില്ലാതിരിയ്ക്കുന്നു ഉയിരോടവൻ
ഉന്മാദ ,ത്തിരകളിൽ ജീവജാലം നീന്തിടുമ്പോൾ
ഉണർത്തുന്നൂ കാമ്യമാകും ജീവസത്യത്തെ….
അദ്രി , തന്നുത്തുംഗമാം, സീമയിങ്കലുണരുന്നൂ
അലയാഴിതന്നിലവൻ, നിദ്ര പൂകുന്നൂ…..
അതുപോലെ, അനശ്വര നിമിഷങ്ങളേകീടുവാൻ
അർക്കനായിട്ടവൻ നിത്യം മുന്നിലെത്തുന്നൂ……
എവിടെയുംനിലനില്ക്കും,
ശ്വാസോച്ഛാസമായി പിന്നെ
എവിടെയും മുഴങ്ങുന്നു ശബ്ദവീചിയായ്
എഴുന്നള്ളും ശക്തിയാണീ , ഈശ്വരനെന്നു തന്നെ
എഴുതി വയ്ക്കുന്നൂ ലോകം, അനുഭവത്താൽ ……..
ഹരിയെന്ന ദ്വയാക്ഷരം, ജീവജാലങ്ങൾ തൻ്റെ
ഹരമായി, നാമമായി, മുന്നിലെത്തുമ്പോൾ
ഹര ഹര സ്വരമായി നാഡിയിങ്കൽ മിടിപ്പായി
ഹരിവരാസനം, പൂകി നില്പൂ ഈശ്വരൻ 🙏