🙏 യുദ്ധത്തിൽ കൊഴിയുന്ന പിഞ്ചുബാല്യങ്ങൾ 🙏

രചന : ബേബി മാത്യു അടിമാലി ✍

ഇസ്രയേൽ – പലസ്തീൻ യുദ്ധത്തെക്കുറിച്ചുള്ള ആശങ്കകൾ ലോകമാകെ സജീവചർച്ചയാകുമ്പോൾ ഇരുരാജ്യങ്ങളിൽനിന്നുമുയരുന്നത് ആയിരക്കണക്കിന് പിഞ്ചുകുട്ടികളുടെ ആർത്തനാദങ്ങളാണ് . അതിർത്തിക്കിരുവശവും കുഞ്ഞുങ്ങളുടെ നിലവിളികൾക്ക് ഒരേസ്വരമാണ്. വീടും വിദ്യാലയവും ബന്ധുക്കളെയുമെല്ലാം നഷ്ടപ്പെട്ട് എങ്ങോട്ടെന്നറിയാതെ നിലവിളിച്ചോടുന്ന നിഷ്ക്കളങ്കബാല്യങ്ങളുടെ ചിത്രം ആരുടെയും കണ്ണുന നയിക്കും.

ഓരോ യുദ്ധവും തകർക്കുന്നത് നാളെയുടെ പ്രതീക്ഷകളെയും സ്വപ്നങ്ങളെയുമാണ്.
യുദ്ധത്തിലും ഭീകരവാദത്തിലും ഇരകളാക്കപ്പെടുന്നവരിൽ നല്ലൊരു ശതമാനവും കുട്ടികളാണ്. സുഡാനിൽ പത്തുലക്ഷം കുട്ടികളാണ് അനാഥമാക്കപ്പെട്ടത് , സിറിയായിൽ 1.4 കോടി കുട്ടികൾ ദുരിതത്തിലാണെന്ന് “യുണിസെഫ് ” വ്യക്തമാക്കുന്നു. കണക്കുകൾ അവസാനിക്കുന്നില്ല , ആഭ്യന്തര യുദ്ധങ്ങൾമൂലം കഴിഞ്ഞ ദശകത്തിൽ രണ്ടുകോടിക്കുട്ടികൾക്ക് വിദ്യാഭ്യാസം നിഷേധികപ്പെട്ടതായി UN വിലയിരുത്തുന്നു. യുദ്ധം ആവർത്തിക്കപ്പെടുന്ന ഓരോ ദിവസവും കുട്ടികളുടെ ജീവനും ബാല്യവും കവർന്നെടുക്കപ്പെടുകയാണ് .

ഓരോ യുദ്ധവും ദുരിതങ്ങളുടെ പേമാരിയാണ് മാനവരാശിക്ക് സമ്മാനിക്കുന്നത്. കൂട്ടമരണങ്ങൾ, കൂട്ടപ്പലായനങ്ങൾ, കൂട്ടക്കുരുതികൾ, ജനിതകരോഗങ്ങൾ, അനാഥത്വം, അംഗവൈകല്യങ്ങൾ ഒരുനൂറു വർഷം കഴിഞ്ഞാലും പരിഹരിക്കാനാകാത്ത പ്രശ്നങ്ങളായിരിക്കും യുദ്ധാനന്തരലോകത്തെ കാത്തിരിക്കുന്നത് ,
ഹിരോഷിമാ ദുരന്തത്തിൽ അണുവികിരണമേറ്റ് പത്തു വർഷം വേദനയിൽ പുളഞ്ഞ് മരണത്തിനു കീഴടങ്ങിയ പന്ത്രണ്ടുകാരി ” സഡാക്കോ ” , വിയറ്റ്നാമിൽ അമേരിക്ക നടത്തിയ ” നാപാം ” ബോംബിങ്ങിൽ പരുക്കേറ്റ് ഉടുതുണി കത്തിവീണ് പൂർണ്ണനഗ്നയായി മരണവെപ്രാളത്തോടെ ഓടുന്ന ഒമ്പതുകാരി ” പാൻ തി കീം ഫുക്ക് ” , സിറയയിൽനിന്ന് പാലായനം ചെയ്ത ബോട്ട് തകർന്ന് കടൽത്തീരത്ത് ഒരുപാവകുഞ്ഞിനെപ്പോലെ മരിച്ചുകിടന്ന , ലോകമനസ്സാക്ഷിയെ കരയിപ്പിച്ച “അലൻ കൂർദ്ദി ” എന്ന പിഞ്ചുകുഞ്ഞ്തുടങ്ങി സാമ്രാജ്യത്വകടന്നാക്രമണത്തിന്റെയും യുദ്ധക്കുരുതിയുടെയും ഇരകളായി നമ്മുടെ ഹൃദയത്തിൽ അണയാത്ത നൊമ്പരക്കനലായി എത്രയെത്ര കുട്ടികൾ,

ലോകത്തെല്ലായിടത്തുമുള്ള മനസ്സാക്ഷിമതഭ്രാന്തന്മാർക്കും വർഗ്ഗീയവാദികൾക്കും പണയം വയ്ക്കാത്ത മനുഷ്യരും പ്രസ്ഥാനങ്ങളും ഈ യുദ്ധക്കൊതിയന്മാർക്കെതിരെ അവരുടെ മതമോ വംശമോ നോക്കാതെ അവരെ ഒരുമിച്ചുനിന്ന് എതിർക്കേണ്ട സമയമാണിത്. നാളെ ഈ ലോകത്തിന്റെ സൗന്ദര്യപുഷ്പങ്ങളായി വിരിഞ്ഞ് സൗരഭ്യം പടർത്തേണ്ട കുഞ്ഞുമക്കളേ ഓർത്തെങ്കിലും.