🌹 നൽഗോൺഡയിലെകരിവേപ്പു തോട്ടങ്ങൾ 🌹

രചന : തെന്നൂർ രാമചന്ദ്രൻ ✍

( കഥ , തികച്ചും സാങ്കല്പികം )
സെക്കൻഡ്രാബാദ് റെയിൽവേ സ്റ്റേഷനിൽ വൈകുന്നേരം ഏഴരയോടെയാണ് എത്തേണ്ടത്.
പതിവുപോലെ നേരത്തെ എത്തി.
ചക്രവാളത്തിലെ അസ്തമനസ്ഥലിയിൽ ചെമന്ന ശ്ലഥ മേഘങ്ങൾ ഒരു വിഷാദ ഭാവം വരച്ചു വച്ചിട്ടുണ്ട്.
നേരത്തെ അസ്തമിക്കാൻ ഇഷ്ടമില്ലാത്ത വൈശാഖ സൂര്യന്റെ അതിജീവന ത്വരയാണ് അവിടെ നിറക്കൂട്ടുകളാകുന്നത്.

ഏതാണ്ട് എട്ടുമണിയോടെ ഗിരി ശങ്കർ എത്തി.
ഇനി മുഷിച്ചിലുണ്ടാകില്ല.
അയാൾ യാത്രയുടെ ഉദ്ദേശം മുതൽ, താൻ ആഗ്രഹിക്കുന്ന ഔട്ട്പുട്ട് എന്താണെന്നതു വരെ എല്ലാം പറയാം…. ബിസിനസ് ഈസ് ബിസിനസ്…..
അതിൽ വെളളം ചേർക്കില്ല…
എന്നാൽ സുഖാന്വേഷണങ്ങൾ ഉണ്ടാകും…
ജീവിത പ്രയാസങ്ങളെ പറ്റി പറയും.
സാങ്കേതിക യുഗത്തിന്റെ സാദ്ധ്യതകളെക്കുറിച്ച് ശുഭാപ്തിവിശ്വാസം വേണം എന്ന് ശഠിക്കും.

നൈനിത്താളിലെ പന്ത് നഗർ കാർഷിക സർവ്വകലാശാലയിൽ നിന്ന് പി.എച്ച്.ഡി. എടുത്തിട്ട് മൂന്ന് പതിറ്റാണ്ടായി.
കൃഷിയും സാങ്കേതിക പുരോഗതിയും ലോക വ്യാപാരത്തിലെ പുതിയ സംവിധാനങ്ങളും എല്ലാം നൂലിഴകളാകുന്ന വ്യവഹാരങ്ങളാണ് ഗിരി ശങ്കറിന്റെ കൺസൾട്ടൻസിയിൽ വന്നുചേരുന്നത്…
അയാൾ ഉറക്കെ ചിന്തിക്കുമ്പോൾ, അയാളെ ആരണ്യകാണ്ഡത്തിൽ നിന്നും കിഷ്കിന്ധയിലേക്ക് മാർഗ്ഗ സൂചന നൽകാനാണ് എന്നെ കൂടെ കൂട്ടുന്നത്.
Am I in the right path…. എന്ന് ചോദിച്ചു കൊണ്ടേ ഇരിക്കും….
ആശയങ്ങൾക്ക് അനുശ്രിതമായ അംഗ വിക്ഷേപങ്ങൾ ഗിരിയുടെ പ്രത്യേകതയാണ്.
പത്ത് മണിയ്ക്ക് ട്രെയിൻ സ്റ്റാർട്ട് ചെയ്തു.

ഇത് ശബരി എക്സ്പ്രസാണ്. തിരുവനന്തപുരം വരെ പോകും…
ഞങ്ങൾക്ക് ഇറങ്ങേണ്ടത് നൽഗോണ്ഡയിലാണ്.
രാത്രി പന്ത്രണ്ടരയ്ക്ക് എത്തും….
ഉറങ്ങാൻ സമയമില്ല….
മിണ്ടിപ്പറഞ്ഞിരിക്കാം എന്നേയുളളു.
നാഗർജ്ജന സാഗർ അണക്കെട്ടിന്റെ കാച്ച്മെന്റ് ഏരിയായെക്കുറിച്ചും കമാൻഡ് ഏരിയായെക്കുറിച്ചും ഗിരിശങ്കറിന് ആധികാരികമായ അറിവാണ്.
ഇവിടെ എല്ലാം സ്വകാര്യ കൃഷി ഇടങ്ങളായിരുന്നു.
അതിനാൽ ഡാം കമ്മീഷനായപ്പോൾ സർക്കാർ ഇടപെട്ടുള്ള ഭൂമി വിതരണം ഒന്നും ഉണ്ടായില്ല…

ഗുണ്ടൂർ കേന്ദ്രീകരിച്ചും നൽഗോണ്ഡ കേന്ദ്രീകരിച്ചും കൃഷിയെ നവീകരിക്കാൻ കൂട്ടായ്മകൾ ഉണ്ടായി.
കൂട്ടായ്മകൾക്ക് നേതൃത്വമുണ്ടായി.
നേതൃത്വത്തിന് രാഷ്ട്രീയ ചായ്വുകളുണ്ടായി…
അതിൽ കുടുംബ വാഴ്ചയുണ്ടായി…
മാത്സര്യ ബുദ്ധി വളർന്നു..
കൃഷിയെ ചുറ്റിപ്പറ്റി സമ്പദ് വ്യവസ്ഥകളുണ്ടായി.
കുടുംബ കലഹം ഒഴിവാക്കാനാണ് ഗുണ്ടൂരിലെ ദായിത്വം ആദിത്യ റെഡ്ഡിക്ക് കൊടുത്തത്.

നൽഗോണ്ഡയിൽ ശരത് റെഡ്ഡിയ്ക്ക് വിട്ടു കൊടുത്തു.
പുറമെ ശത്രുതയില്ല… എങ്കിലും കൃഷിയുടെ അഭിവൃദ്ധി ഏത് പ്രദേശത്താണ് ത്വരിതഗതി നേടുന്നത് എന്ന നിരീക്ഷണം നിരന്തരമായി നടക്കുന്നുണ്ട്.
ഗിരി ശങ്കർ ഇരുവരുടേയും ഉപദേശകനാണ്.
ഇവിടെ നടക്കുന്ന എല്ലാ നന്മ തിന്മകൾക്കും കൃഷ്ണ നദി മൂകസാക്ഷ്യം വഹിച്ചു..
ശാന്തമായി ഒഴുകാൻ മാത്രം ഇഷ്ടമുള്ള മഹാനദി ഇരുകരകളിലുമുള്ള മനുഷ്യരെയും ഇതര ജീവജാലങ്ങളെയും ഒരുപോലെ പരിപാലിച്ചു പോന്നു.
പെട്ടെന്നാണ് ഗുണ്ടൂർ മുളകിന് പരമോന്നത ഗുണനിലവാര സൂചികയായ ജ്യോഗ്രാഫിക്ക് ഇൻഡിക്കേഷൻ സർട്ടിഫിക്കറ്റ് കിട്ടിയത്.
അതിനു വേണ്ട നടപടി ക്രമങ്ങൾ എല്ലാം പൂർത്തികരിക്കാൻ നേതൃത്വം നൽകിയത് ഗിരി ശങ്കർ കൺസൾട്ടന്റ്സ് ആയിരുന്നു.
ഇങ്ങനെയൊരു അംഗീകാരം ലഭിച്ചതോടെ ആദിത്യ റെഡ്ഡിയുടെ ഗ്രാഫ് ഉയരാൻ തുടങ്ങി.

അതിൽ പി.ആർ. നും പങ്കുണ്ടായിരുന്നു.
ഇത്തരം സാക്ഷ്യപത്രങ്ങൾ വെറും അലങ്കാരങ്ങൾ മാത്രമാണെന്നും തൃണതലത്തിൽ സാധാരണ മുളക് കൃഷിക്കാർക്ക് എന്ത് പ്രകടമായ നേട്ടമുണ്ടായി എന്ന ചോദ്യം ഉന്നയിച്ചത് ശരത്‌ റഡ്ഡി തന്നെ ആയിരുന്നു….
അത് നാഗാർജുന സാഗർ ഡാമിന്റെ ഭിത്തികളിൽ തട്ടി പ്രതിധ്വനിക്കുന്നുണ്ട്.
ഒരു തരം അശാന്തി നൽഗോൺഡയിൽ വ്യാപിച്ചിട്ടുണ്ട്.
ഗുണ്ടൂരിൽ നിന്നും നക്സലൈറ്റുകൾ വർദ്ധിച്ചതോതിൽ നൽഗോണ്ഡയിലേക്ക് കടന്നുവരുന്നു എന്നത് മറ്റൊരു ആശങ്കയാണ്.
ആന്ധ്രയും തെലുങ്കാനയും എന്ന ഭേദ ചിന്തയും പ്രചരിക്കുന്നുണ്ട്.
രാത്രി ഒരു മണിക്ക് ശബരി എക്സ്പ്രസ് നൽഗോണ്ഡയിൽ എത്തി.
റെയിൽ സ്‌റ്റേഷൻ വിജനമായിരുന്നു.

ഞങ്ങളെ സ്വീകരിക്കാൻ കാത്തു നിന്ന ഭീമാകാരനായ ശരത് റെഡ്ഡി ഓടി വന്നു…. ഗിരി ശങ്കറിനെ ആലിംഗനം ചെയ്ത് സ്വീകരിച്ചു…
സ്റ്റേഷനിലെ മുഴവൻ സുരക്ഷയും ഒരു റെയിൽവേ പോലീസ് കോൺസ്റ്റബിളിനെ ആശ്രയിച്ചായിരുന്നു.
ശരത് റെഡ്ഡിയുടെ രക്ഷയ്ക്ക് നാല് ബോഡി ഗാർഡ്സ് ഉണ്ടായിരുന്നു.
ഞങ്ങളെ ജാഗ്രതയോടെ എസ്കോർട്ട് ചെയ്താണ് റെഡ്ഡിയുടെ സ്വകാര്യ ഗസ്റ്റ് ഹൗസിൽ എത്തിച്ചത്.
ഭൂമിയെ അനാഥയാക്കാൻ മടിയുള്ള വൈശാഖ ചന്ദ്രിക നാഗാർജുന സാഗർ അണക്കെട്ടിന്റെ കനാലുകളെ പാലരുവികളാക്കി ലാളിച്ചു കൊണ്ടേയിരുന്നു.
ഗസ്റ്റ് ഹൗസിൽ എല്ലാ സൗകര്യങ്ങളും ഉണ്ടായിരുന്നു.
പ്രസന്നവദനകളായ പരിചാരികമാരും…

നേരത്തെയുണരുന്ന ശീലമുള്ളതിനാൽ ഇരുവരും എഴുന്നേറ്റു…
പൂർവ്വിയിൽ ബാല സൂര്യനും പടിഞ്ഞാറ് മാഞ്ഞു തുടങ്ങുന്ന ചന്ദ്രനും..
ഇരുവരും തഴുകിക്കൊണ്ടിരുന്നത് ഗസ്റ്റ് ഹൗസിനു പിന്നിലുള്ള കരിവേപ്പിൻ തോട്ടത്തെയാണ്.
ഈ തോട്ടത്തെപ്പറ്റി ഗിരിശങ്കർ മുൻപെ കേട്ടിട്ടുണ്ട്. ഇപ്പോഴാണ് കാണുന്നത്.
ഇത്തരം തോട്ടങ്ങൾ നൽഗോണ്ഡയിൽ ധാരാളമുണ്ട്.
കരിവേപ്പിന്റെ കേന്ദ്രമാണ് നൽഗോണ്ഡ.
ഇന്നത്തെ ചർച്ച ഈ വിളവിനെ സംബന്ധിച്ചായിരിക്കും…
ഗിരിശങ്കർ പറഞ്ഞു നിർത്തി.
പത്ത് മണിക്ക് ശരത് റെഡ്ഡി എത്തി.
പ്രസന്നവദനൻ…

നൽ ഗോണ്ഡ കരിവേപ്പിന് ജ്യോഗ്രാഫിക്കൽ ഇൻഡിക്കേഷൻ സാക്ഷ്യപത്രം കിട്ടണം എന്നതാണ് തന്റെ ജീവിതലക്ഷ്യം എന്ന് ആമുഖമായി പറഞ്ഞു.
ഇതിന് ഔഷധഗുണങ്ങൾ അനേകമാണ്.
ഇത് കേവലം കൂളിനറി പദാർത്ഥം മാത്രമല്ല…
ഗിരിശങ്കർ ഇൻഡ്യയിലും വിദേശത്തുമുള്ള സർവ്വകലാശാലകളിൽ ഈ ഔഷധ സസ്യത്തെക്കുറിച്ചുള്ള ഗവേഷണങ്ങളുടെ നീണ്ട പട്ടിക അവതരിപ്പിച്ചു..
ഇത് ആന്റി ഓക്സിഡന്റാണ്.
ലിപിഡ് പ്രൊഫൈലിനെ അനുകൂലമായി സ്വാധിക്കുന്ന വസ്തുവാണ്.
കീമോ ചികിത്സ ഒഴിവാക്കാൻ പോലും കരിവേപ്പില സഹായിക്കും…
അരോമാറ്റിക് ഗുണങ്ങളെ വില കുറച്ചു കാണാനാവില്ല….
ഔഷധ നിർമ്മാണ രംഗത്ത് ഈ ചെടിക്ക് വളരെ നിർണ്ണായകമാണ്…..
ഗിരിശങ്കർ കരിവേപ്പിലയുടെ ധനസമ്പാദന ശേഷിയെക്കുറിച്ചും ദീർഘമായി വിശദീകരിച്ചു.

കരിവേപ്പില സത്ത് കരിവേപ്പിലയുടെ പകരക്കാരനാകുമ്പോൾ, ഇന്നത്തെ സപ്ലെ ചെയിൻ ആവശ്യപ്പെടുന്ന നിക്ഷേപങ്ങൾ അഞ്ച് ശതമാനത്തിലേക്ക് താഴ്ത്താം.
കൂട്ടത്തിൽ മലയാളികൾ സേവിക്കുന്ന കാളശാകാദി കഷായത്തെക്കുറിച്ചും പരാമർശനമുണ്ടായി…
കാളശാക വിജയാ മഹൗഷധെ:
സാധിതം രസ യുഗാക്ഷി ഭാഗ:
വാരി വാരയതി ശൂലതൃഡ് ഭ്രമാൽ
വേഗിനീമപി വിഷൂചികാ ക്ഷണാൽ
നൽഗോണ്ഡയുടെ മോചനം… ഇന്റഗ്രേറ്റഡ് കറിപത്ത പ്രോജക്റ്റിൽ നിക്ഷിപ്തമാണ്.
അതു സംബന്ധിച്ച ധാരണാപത്രം അടുത്ത ദിവസം ഒപ്പുവയ്ക്കാൻ തീരുമാനമായി.
ശരത് ഇൻകോർപ്പറേറ്റ്സും ഗിരിശങ്കർ കൺസൾട്ടന്റസും, ഗുണഭോക്താക്കളായ ഇറക്കുമതി രാജ്യങ്ങളും ധാരണാപത്രത്തിലെ പങ്കാളികളായിരിക്കും….
ജ്യോഗ്രാഫിക്ക് സാക്ഷ്യപത്രം കരിവേപ്പിലയ്ക്കാണോ അതിനെ സംസ്കരിക്കുന്ന രീതിയ്ക്കാണോ നേടേണ്ടത് എന്ന കാര്യം ഇന്ന് വീണ്ടും ചർച്ച ചെയ്തു തീരുമാനിക്കും….
രാത്രിയിൽ ശരത് റെഡ്ഡിയുടെ കറിവേപ്പില തോട്ടമായ കാളശാരണ്യത്തിൽ ഉദ്യാനവിരുന്നിനുള്ള തയ്യാറെടുപ്പുകൾ തുടങ്ങി.

രാത്രി പതിനൊന്നു മണിയ്ക്കാണ് നൽഗോണ്ഡ പോലീസ് ഡിസ്ടിക്റ്റ് പോലീസ് സൂപ്രണ്ട് മഞ്ജുള നായർക്ക് ഹോട്ട്ലൈൻ സന്ദേശം ലഭിച്ചത്…
രാത്രി മൂന്നു മണിക്ക് മുന്നേ നക്സലൈറ്റുകളുടെ ഒ.എസ്. എന്ന ഓപ്പറേഷൻ ഉണ്ടാകും…
രണ്ട് റെഡ്ഡിമാരിൽ ഒരാൾ ടാർഗറ്റ് ചെയ്യപ്പെടുന്നുണ്ട്.
ശരത് റെഡ്ഡി ഒരു സോഫ്റ്റ് ടാർഗറ്റ് ആണല്ലൊ….
സന്ദേശം അവസാനിച്ചു…
മഞ്ജുള നായർ കറിവേപ്പില തോട്ടം കോർഡോൺ ചെയ്യാൻ വെറും നാല്പത്തഞ്ച് മിനിറ്റ് സമയമെ എടുത്തുള്ളു.
പക്ഷെ..ഓ.എസ്. ഓൺ ദി സ്പോട്… ഓപ്പറേഷൻ സംഭവിച്ചു കഴിഞ്ഞു..
ശരത് റെഡ്ഡിയുടെ കരിഞ്ഞ ശരീരം തിരിച്ചറിഞ്ഞു..

Famous scientist crippled.
Scientist’s aide miraculously esaped…
എന്ന തലവാചകം ഹൈദരാബാദിൽ നിന്നും ദേശീയ വാർത്താ ഏജൻസികളിൽ എത്തുമ്പോൾ ഇൻഡ്യ ഉറങ്ങുകയായിരുന്നു.
What is curry patha in front of Red chillie… എന്ന ഒരു കുറിപ്പ് സംഭവസ്ഥലത്തു നിന്നും ലഭിച്ചു…
അയാളുടെ മൊബൈലിൽ മിസ്ഡ് കാൾ ലിസ്റ്റിൽ കാർത്യായനി ഗിരി എന്ന പേര് തെളിഞ്ഞു കാണാമായിരുന്നു.