💐❤️🌹വരുത്ത് പോക്ക്🌹💐❤️

രചന : ബിജു ഗോപാൽ ✍

ഒക്കത്തൊരു
കൈക്കുഞ്ഞുമായി ,
വേലിതലയ്ക്കൽ
പെങ്ങളൂട്ടി വരും,
പുരക്ക് തീപിടിച്ച പോലവളെ
നോക്കിതലക്ക് കൈപിണച്ചമ്മ
ഇടറിയോടി ചെല്ലും………………………
ഉണക്കുകപ്പതികത്തിയതും,
ഉപ്പുമീൻചതച്ചതും
കൊണ്ടൊരുവട്ടിമണല് വാരിയാതീയിലേ
ക്കെറിയും……
വേലിക്കൽചുറ്റഴിയുന്നൊരു
പുല്ലാനിമൂർഖൻ
കൈക്കുഞ്ഞിനെനോക്കി
കണ്ണ് നിറഞ്ഞ്മടങ്ങും…..
ഇറയത്ത് കിടന്നു്
മുൾക്കിരീടം ചൂടിയ
ഓലിയിൽ നിന്നും,
ഒരു പിഞ്ഞാണംവെള്ളം
കുടിച്ചിറക്കുമ്പോൾ ,
പെങ്ങളൂട്ടിയുടെ,
പൊട്ടാറായ…,
കൊന്തയിൽ കിടന്ന്
ക്രൂശിതൻ
കണ്ണുകളിറുക്കിയടക്കും………………
അവളുടെ
കുഴിഞ്ഞ നിറകണ്ണുകൾ ,
തുളുമ്പിതല്ലിവീണ
ഉപ്പുതുള്ളികൾ
അവളെപെറ്റിട്ടമണ്ണിനെ
ജ്ഞാനസ്നാനപ്പെടുത്തി,
മിണ്ടാമഠത്തിലേക്കയയ്ക്കും…………….
കെട്ടിമേയാത്ത ,
മാടംപോലമ്മ
വളഞ്ഞു കുത്തി
കൂനികൂനി
പെങ്ങളൂട്ടിയുടെ
എണ്ണ കാണാത്ത
മുടികോതും …………..
പാലുവറ്റിയമാറിലൂടെ
വാവച്ചിയുടെ,
കുഞ്ഞിക്കൻ വിരലുകൾ
പട്ടിണി വയറിന്റെ
തിരിച്ചറിയൽ കാർഡ് തിരയും………….
പൂവാലൻ
ചെങ്കീരികൾ ,
പുരയുടെനാലു മൂലകളിൽ
നിന്നെത്തി നോക്കും
പച്ചമരുന്നുകൾ കൂട്ടി,
ചവച്ചു തുപ്പിയൊരു
പേറ്റുരക്ഷ നൽകും………………..
മാടത്തകൾ
അവർക്ക് മുകളിലൂടെ
പറന്ന് പറന്ന് ,
വരി നെൽമണികൾ
താഴെവക്കുപൊട്ടിയ ,
ജീവിതങ്ങൾക്കിട്ടു
ചിലച്ചുപോകും………..
പുരക്ക്
തീയാർക്കുമ്പോൾ ,
നാട്ടുപാട്ടു മൂളിയൊരു
വാഴവെട്ടിയമ്മ,
വാവച്ചിയുടെ
കണ്ണുകളിലേ
ക്കുറക്കംവിളിക്കും………
തെക്കുകിഴക്കേ
പൂകൈതകൾക്കിടയിൽ,
കരിമണ്ണുപുതച്ചുറങ്ങുന്ന
ആൺപിറന്നവനെയോർത്ത്,
“ഇടനാടൻ ” പാടി
ക്കരഞ്ഞുറങ്ങും…………
അങ്ങേരുടെ
നെഞ്ചിൻ കൂടിനുള്ളിൽ നിന്നു് ,
പൊങ്ങിയ മുരിക്കിൻ പൂക്കൾ,
അവന്റെ പെണ്ണാളുടെ
തിമിരം മൂടിയ
കൺവെട്ടെത്തെല്ലാം
മുറുക്കി തുപ്പും…………………….
പൂക്കൈത
തിരിഞ്ഞ് നോക്കി നോക്കി
തോടിനപ്പുറം മുങ്ങാംകുഴിയിടുന്നു,
ഇരുട്ടൊരു
കരിമ്പടം കൊണ്ട് ,
മാടം മൂടിനിൽക്കുന്നു…………….
ചത്തുപോയ
കിനാവുകളുടെഅടുപ്പത്ത്,
പാതിവെന്ത വിറകുകളായി
അമ്മയും
പെങ്ങളൂട്ടിയും
വാവച്ചിയും,
ഉറങ്ങിയിട്ടുണ്ടാകുമോ?
ഉറക്കമെങ്കിൽ
അവരെല്ലാംനാളെ
ഉണരാതിരിക്കുമോ……. …….?