🎨സിദ്ധിധാത്രി🎨

രചന : കൃഷ്ണമോഹൻ കെ പി ✍️

നവനവ പ്രതീക്ഷകളേകുന്നു സിദ്ധിധാത്രി
നവരാത്രിയിതിന്നൊമ്പതാം ദിനത്തിങ്കൽ
പതിക്കു പാതിദേഹം ദാനം ചെയ്തവനുടെ
പാരമാം ശരീരത്തിൻ മാറ്റുകൂട്ടീടും ദേവി
ദാനദേവതേ,നീയോ ധൂസര വർണ്ണം പൂണ്ടു
ദാനവർക്കെതിരായി എപ്പൊഴും യുദ്ധം ചെയ് വൂ
ആദി ദേവത തൻ്റെ അവതാരമാകും ദുർഗ്ഗേ
അചലനന്ദിനിയാകും പാർവതീ നമസ്തുതേ
നീ മഹാസരസ്വതി, നീ തന്നെ മഹാലക്ഷ്മി
നീ തന്നെ മഹാകാളി നിത്യ സുന്ദരീ ….ദേവീ
നിർമ്മലനീലാകാശം തന്നിൽ നിന്നൊരു നേരം
നിർമ്മമേ, ഭൂലോകത്തിൽ സംതൃപ്തിയുണർത്തീടും
നിത്യാന്ധതയുടെ ലോകത്തു നിന്നും, മാതേ
നിത്യവുമുണർത്തുന്നൂസിദ്ധിധാത്രിയതായ്
ആരുമേയില്ലാത്തൊരു ഏഴതൻ മനസ്സിൻ്റെ
കോണിലെ വെളിച്ചമായ് മാറു നീ ഭഗവതീ…..
നന്മകൾ നേരുന്നോരീ നവരാത്രി ദിനങ്ങൾ തൻ
സന്മനോഭാവം പൂണ്ട,സിദ്ധിധാത്രിയേ, നമ:
ഭാഷ തന്നപൂർണ്ണത, വരികളിലുണ്ടെന്നാലും
ഭാസുരേ, ക്ഷമിക്ക നീ സിദ്ധിധാത്രിയാം….ദേവീ🙏🙏