🎴മൾബെറിത്തോട്ടത്തിലെ ലൈബ്രറി🎴

Zehraan Marcelo*

ഇന്നലെയായിരുന്നു ഡയാലിസിസ്!
ഭിഷഗ്വരൻമാർ എന്റെ
സിരകളിലൂടൊഴുകിയിരുന്ന
മിലൻ കുന്ദേരയുടെ രക്തം
ഊറ്റിക്കളഞ്ഞ് പകരം കാഫ്കയുടെ
രക്തം നിറയ്ക്കയുണ്ടായി.
മൾബെറിത്തോട്ടത്തിലെ ലൈബ്രറിയുടെ
അകത്തളത്തിൽ ഒരു
പട്ടുനൂൽപ്പുഴുവായ് ഇഴയുകയും,
അലമാരകളിൽ കാഫ്കയുടെ
‘രൂപാന്തരം’ എന്ന കഥയടങ്ങിയ
പുസ്തകം തിരയുകയുമാണ് ഞാൻ.
ലൈബ്രറിക്കെട്ടിടത്തിലെ
പഴകിയ നിശബ്ദതയെയും,
ലൈബ്രേറിയൻ മൂങ്ങയുടെ തുളയ്ക്കുന്ന
നോട്ടത്തെയും നിസ്സാരമവഗണിച്ച്
രണ്ട് പരുന്തുകൾ ഹിറ്റ്ലറുടെ
ആത്മകഥാപുസ്തകം നിവർത്തിവെച്ച്
അന്നേരമൊരു വാഗ്വാദമാരംഭിക്കുന്നു.
ഹോ! എന്തൊരു ബഹളം. അസഹനീയം!
ലൈബ്രറിക്ക് പുറത്തേക്കിഴയവേ
തർക്കം മൂത്ത് പരുന്തുകളിലൊരാൾ
‘മെയിൻ കാംഫ്’ എടുത്ത് പുറത്തേക്കെറിഞ്ഞു.
ഞാനതിന്റെ പുറംചട്ടയിലേക്ക് കുനിഞ്ഞു.
ഹിറ്റ്ലറല്ല. നരച്ചുനീണ്ട താടിയുള്ളൊരാൾ!
ആരാണത്…?
ഇതാണോ ഇത്രനേരം ഞാൻ തിരഞ്ഞിരുന്ന ‘രൂപാന്തരം’…?
മൾബെറിവേരുകളിലൂടെ ഞാനിതാ
മണ്ണാഴങ്ങളിലേക്കൂർന്നിറങ്ങുന്നു.
അടുത്ത ഡയാലിസിസിൽ എനിക്കീ
കാഫ്കയുടെ രക്തം
പുറത്തേക്കൊഴുക്കിക്കളഞ്ഞ് പകരം
ദസ്തയെവ്സ്കിയുടെ രക്തം കയറ്റണം.
മൾബെറിത്തോട്ടത്തിലെ
ലൈബ്രറിയലമാരകളിൽ
ഭൂതാവിഷ്ടരുടെ കഥാപുസ്തകം
തിരയണം.
അക്ഷരങ്ങളുടെ കൊടുങ്കാട്ടിലൂടെ
ഉൻമാദിയായലയണം.