രചന : സക്കരിയ വട്ടപ്പാറ.✍
സ്വർണ്ണക്കൊട്ടാരത്തിൽ
മഴവില്ലുണരുന്നു,
മൺകുടിലിൽ
കരിമുകിൽ പെയ്യുന്നു.
അവകാശങ്ങൾ തേടി
അലയുമ്പോൾ,
ചിലർക്ക് മധുരം,
ചിലർക്ക് കൈപ്പ് .
സിംഹാസനത്തിൻ നിഴലിൽ വിരുന്നൊരുങ്ങുന്നു,
ചുടലപ്പറമ്പിൽ നിലവിളികളുയരുന്നു.
നിയമത്തിൻ താളുകൾ മറിയുമ്പോൾ,
ചിലർക്ക് ചിറകുകൾ,
ചിലർക്ക് ചങ്ങലകൾ.
മാന്ത്രികവടി വീശുമ്പോൾ
മലകൾ നിരങ്ങുന്നു,
മൺതരികൾ പോലും
അനങ്ങാതെ നിൽക്കുന്നു.
അവകാശങ്ങൾ തേടി
അലയുന്നു ചിലർ,
ചിലർക്ക് സ്വർഗ്ഗം,
ചിലർക്ക് നരകം.
നീതിതൻ കണ്ണുകൾ
ഇരുളിൽ മറയുന്നു,
അനീതിയുടെ കാറ്റുകൾ
കൊടുങ്കാറ്റാകുന്നു.
സാധുക്കൾ കണ്ട
സ്വപ്നങ്ങൾ തകരുന്നു,
നീതിക്കുവേണ്ടി അവർ
നിശ്ശബ്ദമായി കേഴുന്നു.