രചന : മധു നിരഞ്ജൻ✍
വയലാർ രാമവർമ്മസാറിന്റെ ഓർമ്മകൾക്ക് മുന്നിൽ പ്രണാമം🙏
ഓർമ്മകളിന്നിതിൽ പൂവിടും നേരം,
ഒരു യുഗം മുന്നിൽ വന്നണഞ്ഞപോലെ.
വയലാർ, നിൻ നാമം മരിക്കാത്ത വരികളിൽ,
മായാത്ത രാഗം പോൽ മുഴങ്ങുന്നു.
അക്ഷരമാലയിൽ തീപ്പൊരി കോരി,
വിപ്ലവത്തിന്റെ ശംഖൊലി മുഴക്കി നീ.
പ്രേമത്തിൻ സൗന്ദര്യം ആർദ്രമാം തൂലികയാൽ,
പാഴ്മുളന്തണ്ടിലും പനിനീരു പകർന്നു നീ.
”ഇല്ലെനിക്കൊരിക്കലും മരണം” എന്ന്
ഗർജ്ജിച്ച ധീരനാം കാൽപ്പനികൻ.
മാനസസരസ്സിന്റെ തീരത്തുനിന്ന്
മാനവഹൃദയത്തിലേക്ക് ഒഴുകി നീ.
കാലം മറക്കാത്ത ഗാനങ്ങളായി,
നമ്മുടെ നാവിൽ നിറഞ്ഞൊരീ വരികൾ.
സത്യവും സൗന്ദര്യ ദർശനങ്ങളും,
നിൻ കാവ്യസാഗരത്തിൻ തിരകളായി.
ഓർമ്മതൻ പൂന്തേൻ നുകരുന്നീ വേളയിൽ,
അനശ്വരമാം ആ സർഗ്ഗസംഗീതം.
ഒരു ജന്മം കൂടിയീ മനോഹര തീരത്ത്,
വയലാർ, നിൻ പാട്ടായി പുനർജ്ജനിക്കട്ടെ.
“ആരൊരാൾ നിന്റെ തേരോട്ടം തടയുവാൻ?
ആരൊരാൾ നിന്റെ നാദം ശമിപ്പിക്കാൻ?”
