രചന : യൂനസ് മണത്തല ✍️
ഇല്ലിമുളം വനാന്തരങ്ങളിൽ നിശീഥിനി പാടുമ്പോൾ
ഇലനാരുകൾക്കുപോലും പ്രണയസ്പന്ദനം ഉദിക്കും
അത്തിവൃക്ഷ ശാഖാതലത്തിൽ നീ വിരിച്ച പുഞ്ചിരി
അനശ്വര സ്മൃതിയായി ഹൃദയഗർഭത്തിൽ ജ്വലിക്കുന്നു
ദോളായമാന സ്വപ്നങ്ങളുടെ മൃദുതാളങ്ങളിൽ
മന്ദമാരുതൻ നിൻ നാമം മൗനമായി ചൊല്ലും
മഴവില്ലിൻ വർണ്ണങ്ങൾ മാഞ്ഞുപോയ സന്ധ്യപോൽ
മനോജാലകങ്ങളിൽ വീണ്ടും നിൻ മുഖം വിരിയും
വാചാലമാകാതിരുന്ന അനുരാഗത്തിന്റെ നിഴലായി
ശശിധവള രാവുകളിൽ നീ ഒഴുകിയെത്തും
അർദ്ധോന്മീലിത ജാലകവാതായനങ്ങളിൽ
പുരാതന ഗീതസ്മൃതിപോൽ നീ നിറഞ്ഞുനിൽക്കും
പുലരിവേള തഴുകിയ തൃണഭൂമിക്കപ്പുറം
പുഷ്പങ്ങളോടുപോലും ഞാൻ നിൻ വാർത്ത ചോദിച്ചു
അപ്രത്യക്ഷമായ പാതകളുടെ ഏകാന്തതയിൽ
കാലാതീത പ്രണയമായി ഞാൻ നിന്നെ കാത്തിരിക്കുന്നു
