🌂നിർമ്മലോക്തികൾ, നിർമ്മമയോതീടുമ്പോൾ🌂

രചന : കൃഷ്ണമോഹൻ കെ പി ✍

നീ വെറും നാരായമാണെന്നതുമറിയില്ലേ
നിന്നെ, ഞാൻ വിരൽത്തുമ്പാൽ പിടിച്ചങ്ങെഴുതിപ്പൂ
നീരദ സ്വപ്നങ്ങളെക്കൂട്ടിച്ചേർത്തുറക്കുന്നൂ
നാളെയെച്ചിന്തിപ്പിക്കാൻ സ്വപ്നത്തിലെത്തീടുന്നൂ
നാളേ തൻ ഭാവ താള രാഗങ്ങളെല്ലാം നിൻ്റെ
നീറുന്ന മനസ്സിൻ്റെ മായയാണറിക നീ
നീ, വെറും ഭിക്ഷാപാത്രം, ഞാനിട്ടുതരുന്നതാം
നാണയത്തുട്ടുകളാം, വാക്കുകൾ കുറിയ്ക്കുന്നൂ….
നാമെന്നു കണ്ടീടാതെ, ഞാനെന്നു കണ്ടിട്ടെന്നും
നാരായമുനയായി, നീയെന്നും വിലസുന്നൂ
നിന്നുടെ മുന്നിൽ നിന്നീ, ഞാനാകും വാക്കിൻ ഭാവം
നിർന്നിമേഷയായി
ക്കാണുന്നു സർവസ്വവും
നിശ്ചല നിമിഷത്തിൽ നിന്നുമീ, ഭാവാത്മക
നിത്യ നിത്യതയുടെ, വാക്കുകളരുളുമ്പോൾ…
നീയതു പകർത്തിയിട്ടാനന്ദ കല്ലോലിനീ
തീരത്തെ പ്രാപിക്കുമ്പോൾ, ഞാനൊന്നു ചിരിയ്ക്കട്ടേ…
നീരഭ നീലാകാശ നിർമ്മല ഭവനത്തിൽ
നീയൊരു മഴമേഘം,പെയ്യുക പ്രകാശത്തിന്നായ്…🧚🏽‍♀️