🥀 തീരം പറഞ്ഞ കഥ…♥️

രചന : രാജു പള്ളിക്കൽ ✍️

ചില കഥകൾ അവസാനിക്കുന്നത് വാക്കുകളിലല്ല…
ഹൃദയത്തിൽ മുറിവുകളായി അവശേഷിക്കുമ്പോഴാണ്… 💔
തിരകൾ ഇന്നും തീരത്തെ
തേടിയെത്തുന്നുണ്ട്…
ഓരോ വരവിലും ഒരു സ്നേഹം,
ഓരോ മടക്കത്തിലും ഒരു വിരഹം…💙
ഒരിക്കൽ ആ തീരവും സ്വപ്നം കണ്ടിരുന്നു…
തിരകൾ തന്നെ പുണർന്നുനിൽക്കുന്നൊരു കാലത്തെക്കുറിച്ച്.
പക്ഷേ, തിരകൾക്ക് എന്നും
യാത്രയായിരുന്നു പ്രിയം…
തീരത്തിനാകട്ടെ, കാത്തിരിപ്പും…!
പറയാതെ പോയ വാക്കുകൾക്ക്
കടലിന്റെ ആഴമുണ്ടായിരുന്നു…
പൊഴിയാതെ നിന്ന കണ്ണുനീരിന്
മഴയുടെ നനവുമുണ്ടായിരുന്നു…🥀
കാലം എത്രയോ സന്ധ്യകളെ
കടലിൻ നെഞ്ചിലേക്ക് മായ്ച്ചുകളഞ്ഞു…
എന്നിട്ടും, ചില ഓർമ്മകൾ മാത്രം
തീരത്തിന്റെ മണൽത്തരികളിൽ
മായാതെ കിടന്നു…
ഇന്നും തിരകൾ വരുന്നു…
തീരത്തെ തൊട്ടുതലോടുന്നു…
പിന്നെ, ഒരു യാത്രാമൊഴി പോലും
പറയാതെ…
അകലങ്ങളിലേക്ക് മടങ്ങുന്നു…
പക്ഷേ, ആ തീരത്തിനറിയാം…
തിരകൾക്ക് തിരികെ പോകാൻ കടലുണ്ട്…
എന്നാൽ, തിരകൾക്കായി മാത്രം ജീവിച്ച
തീരത്തിന്റെ ഹൃദയത്തിൽ
ഇന്നും ഒരു കടൽ ബാക്കിയാണ്…! 💔
ചില കാത്തിരിപ്പുകൾക്ക് അവസാനമില്ല…
ചില പ്രണയങ്ങൾക്ക് സ്വന്തമാകലുമില്ല…
എങ്കിലും, അവ ഹൃദയത്തിൽ തീർക്കുന്ന കവിതയ്ക്ക്
ഒരിക്കലും അന്ത്യമുണ്ടാകില്ല… 🥀❤️