🌹 സ്നേഹ വീട് 🌹

രചന : ബേബി മാത്യു അടിമാലി✍

സ്നേഹമുദ്രയാലൊരു വീടൊരുക്കണം
വിശ്വാസമാകണം മൂലകല്ല്
സാഹോദര്യത്തിന്റെ ശംഖൊലി മുഴങ്ങണം
ശാന്തിയാൽ നിറയണം ഗേഹമാകേ
പാരസ്പര്യത്തിന്റെ വിത്തുകൾ വിതയ്ക്കണം
പതിരില്ലാ സ്നേഹത്തിൻ കതിരുകൾ കൊയ്യണം
പരസ്പരം സഹിക്കുവാൻ ക്ഷമിക്കുവാൻ കഴിയണം
നന്മകൾ പൂക്കുന്ന പൂമരമായ് തീരണം
മാനവ ത്യാഗത്തിൻ പാഠശാലയാക്കണം
മന്ദസ്മിതത്തിന്റെ മധുരം വിളമ്പണം
ആനന്ദവേളകൾ ആഘോഷമാക്കണം
ദു:ഖവും ദുരിതവും പങ്കിട്ടെടുക്കണം
ഇത്തരം വീടുകൾ നാടെങ്ങും നിറയണം
നാടിൻ മുഖഛായ മാറ്റുവാൻ ശ്രമിക്കണം
പുതിയൊരു സംസ്ക്കാര പൈതൃകം തീർക്കണം
ഈ നാട് നന്മയിൽ പൂത്തു തളിർക്കണം.