🌹 അതിരുകൾ 🌹

രചന : ബേബി മാത്യു അടിമാലി ✍

അതിരുകൾ വേണം അതിർവരമ്പും
അവയെക്കടന്നു നാം പോയിടല്ലെ
അതിരുകൾ ലംഘിച്ചു ജീവിച്ചവർ
അവസാനമടിതെറ്റി വീണുപോയി

വീടിനു വേലികൾ അതിരുതന്നെ
കടലിനു തീരവും അതിരല്ലയോ
വാക്കിനും നോക്കിനുമുണ്ടതിര്
അതിരുകൾ ആവശ്യമത്രെപാരിൽ

അപരന്റെ അന്തസു കാത്തിടേണം
അത്മഭിമാനത്തെ മാനിക്കണം
അതിരുവിട്ടുള്ള പ്രവർത്തികളാൽ
ആരും കളങ്കിതരാകരുതേ

പ്രകൃതിയിലുള്ളൊരാ ചൂഷണങ്ങൾ
അതിരുവിട്ടങ്ങു കടന്നുപോയാൽ
പ്രകൃതിയും ക്ഷോഭിച്ചു ക്ഷുദ്രയാകും
സർവ്വനാശത്തിൻ മണിമുഴങ്ങും

എന്തിനുമേതിനും നിയമങ്ങളും
അതിരുകളുമുണ്ടതോർക്കണം നാം
നവമാധ്യമങ്ങൾക്കുമുണ്ടതിര്
അവയെനാം പാലിച്ച് പോയിടേണം

സ്വാതന്ത്രൃമെന്നൊരു വാക്കതിനെ
തെറ്റായ്ദ്ധരിക്കരുതെൻകൂട്ടരേ
ഒന്നിച്ചുനിൽക്കണം ഒന്നായ്ചരിക്കണം
അപ്പോഴുമതിരുകൾ പാലിക്കണം.