രചന : അൻവർ ഷാ ഉമയനല്ലൂർ✍️
ഗിരിമസ്തകങ്ങൾത്തകർത്തുവന്നെത്തിയ
പ്രളയമാ,യുഗ്ര പ്രതികാരമായ്; പ്രകൃതി,
സ്വച്ഛമുറങ്ങിക്കിടന്ന ഗ്രാമങ്ങൾ തൻ
നിത്യപ്രതീക്ഷതൻചിത്രമുടച്ചപോൽ
ദുഃഖസത്യങ്ങളായ് മാറിയന്നതി,തീവ്ര-
വർഷമായ്,നീറും ദുരന്തചിത്രങ്ങളായ്
കരൾപിളർത്തീടുമസഹ്യമാം വേദന-
യേകിത്തകർത്തുപാഞ്ഞെത്തിയ ദുർദ്ദിനം
പ്രകൃതിക്കലിപൂണ്ട പെയ്ത്തിനാലാ ത്മാക്ക-
ളൊന്നായ് ത്യജിച്ചതാം ഗ്രാമീണതട്ടകം
സ്നേഹമിത്രങ്ങൾതൻ ഭയാനക രംഗമാ-
യെത്രവേഗത്തിലാ, ദുഃഖത്തിലാഴ്ന്നു പോയ്
പ്രകൃതിതൻ താണ്ഡവത്താൽ കബന്ധങ്ങളായ് –
ത്തീർന്നെത്ര ബന്ധുര ബന്ധങ്ങളീ വിധം
അസ്തമനത്തിൽനിന്നുദയംകുറിക്കുവാൻ
സ്നേഹ,നിസ്വാർത്ഥ കരങ്ങളായ്ത്തീരുവാൻ
ഝടിതി കാരുണ്യമായണിചേർന്നു മലയാള-
മണ്ണിന്റെയാർദ്രതയുള്ളതാം യുവതകൾ
ചിന്തിച്ചുണർന്നിടാം
കൈകോർത്തുകൊൾകനാം പ്രകൃതി
സംരക്ഷണത്തിന്റെ വക്താക്കളായ്
ലോകമേ,യതിദൂരമില്ലിനിയെന്നപോൽ
കാലമന്നോതിയ ചൂരൽദുരന്തവും
ചിന്തനീയം നമുക്കെന്നുമൊരു പാഠമായ്
പ്രകൃതിയേൽപ്പിച്ചതാം സഹനാർദ്ര പുസ്തകം
മാറിനിൽക്കേണ്ടതല്ലതിദുഃഖ ചിത്രമായ്-
ത്തീരുന്നു പ്രകൃതിനാശത്തിന്റെ നാളുകൾ
കാത്തുസൂക്ഷിക്കനാം കൈരളി
തൻഹൃദയ കാവലായ് നിൽക്കുമീ,
ഗ്രാമപ്രകൃതിയും .
മാനവജീവിതം സുഖരമ്യമാക്കുവാൻ
കനിവോടെയേകിയതാ,മീ പ്രപഞ്ചവും.