🙏 ഭക്ത്യാദരം 🙏

രചന : അൻവർ ഷാ ഉമയനല്ലൂർ ✍

ഭദ്രദീപം തെളിച്ചീടുമൊരു പുലരിപോൽ
ഭവ്യതയോടുയരുന്ന നളിനങ്ങൾ പോൽ
ഭക്ത്യാദരം തിരുസ്മരണയാലെന്മനോ-
ഭിത്തിയിൽ തെളിയുന്നു തവരമ്യ സുസ്മിതം.

ഭക്തഹൃദയങ്ങൾക്കു തുണയേകിടുന്നതാം
ഭഗവത് കരങ്ങളാലിരുൾനീക്കിയനുദിനം
ഭഗനീയമായിത്തെളിക്കയാൽ ചിന്തകം
ഭഗ്നമാകാതുണർത്തുന്നുദയ കാവ്യകം.

ഭജനീയ നാമങ്ങളോരോന്നുമോർത്തു ഞാൻ
ഭഗവത് സമക്ഷമർപ്പിക്കുന്നു കവിതകൾ
ഭക്തവത്സലനേ, കൊതിക്കുന്നു തിരു വരം
ഭയരഹിത ജീവിതോദ്യാനത്തിൻ സുസ്മിതം.

ഭദ്രശീലർക്കുദയമേകുവോനെൻ ഭവാൻ
ഭവകനാശങ്ങൾ നീക്കുന്നതാം തമ്പുരാൻ
ഭസ്മീകരിച്ചഭയമേക,യീ നൊമ്പരം
ഭാഗീരഥിപോലൊഴുക്കുമെൻ കാവ്യകം.

ഭാവനോത്കൃഷ്ട കാവ്യങ്ങളാക്കീടുവാൻ
ഭാസ്കരബിംബം കണക്കെ ദർശിക്കുവാൻ
ഭാവുകമരുളിത്തെളിക്കുകെൻ കാവ്യകം
ഭിക്ഷണം ചെയ്യുന്നിതേൻ സർഗ്ഗമാനസം.

ഭാഷിതം കരുണാർദ്രമാകയാൽ മമ സ്നേഹ-
ഭാജനാനന്ദവും പരിരക്ഷയേകണം
ഭൂസ്വർഗ്ഗമൊരുപോൽ തണലായി മാറണം
ഭാസുരാനന്ദമേകട്ടേ; വിചാരവും.

ഭാരതോത്കൃഷ്ട കവിയായെന്നെ മാറ്റുവാൻ
ഭാവികാവ്യങ്ങൾ കൊതിക്കുന്നു ഭൂതലം
ഭാഷാരത്ന വ്യതിരിക്ത മലയാളമേ,
ഭാഗ്യോദയത്താൽത്തെളിക്കണേ, ജാതകം.

ഭീഷ്മ പിതാമഹൻ പണ്ടു ശരശയ്യയിൽ
ഭീതിദലോകമറിഞ്ഞതിൻ സാമ്യമായ്
ഭിന്നഹൃദയത്തോടെ തുടരുന്നു ജീവിതം
ഭാരതാംബേ, നിനക്കറിയില്ലെ, യാ മനം?