രചന : സെറ എലിസബത്ത്✍.
ജീവിതത്തിൽ ഒരിക്കലെങ്കിലും നമ്മെ ആഴത്തിൽ വേദനിപ്പിച്ച ഒരാൾ ഉണ്ടാകും.
സ്നേഹിച്ചവരായിരിക്കാം അവർ — സുഹൃത്തായോ, കുടുംബാംഗമായോ, ഒരിക്കൽ ആത്മാർത്ഥമായി വിശ്വസിച്ച ഒരാളായോ. അവർ പറഞ്ഞ ഒരു വാക്ക്,
അല്ലെങ്കിൽ ചെയ്ത ഒരു കാര്യം —
അത് നമ്മളെ തകർക്കുന്ന പോലെ തോന്നും.
ആദ്യം മനസ്സിൽ ചോദ്യങ്ങൾ നിറയും:
“എന്തിനാണ് അവർ അങ്ങനെ ചെയ്തത്?”
“ഞാൻ എന്ത് തെറ്റാണ് ചെയ്തത്?”
“അവർക്ക് എങ്ങനെ ഇങ്ങനെയൊക്കെ പെരുമാറാൻ കഴിയുന്നു?”
ഈ ചിന്തകൾ വേദനയെ കൂടുതൽ മൂർച്ചയാക്കും.നമ്മൾ നമ്മുടെ വേദനയുടെ ചുറ്റളവിൽ കുടുങ്ങി പോകും,
ഓരോ ഓർമ്മയും വീണ്ടും വീണ്ടും തീപൊള്ളലായി തിരിച്ചെത്തും.
പക്ഷേ ഒരുദിവസം
ഒരു നിമിഷം നിശ്ശബ്ദമായി നിൽക്കുമ്പോൾ,
അവരുടെ ഭാഗത്ത് നിന്ന് നോക്കാനുള്ള ധൈര്യം ഉണ്ടാകും.
“അവർ അങ്ങനെ പെരുമാറാൻ എന്തെങ്കിലും കാരണം ഉണ്ടാകുമല്ലോ?” അവരും ഒരിക്കൽ വേദനിക്കപ്പെട്ടവരാകാമല്ലോ?
അവർക്കും പറയാൻ കഴിയാത്ത മുറിവുകൾ ഉണ്ടായേക്കാം. ചിലർ അവരുടെ വേദന മറ്റുള്ളവരിൽ ഒഴുക്കുകയാണ് ചെയ്യുന്നത്,
അത് അവരറിയാതെയാണ് സംഭവിക്കുന്നത്.
അങ്ങനെ ആലോചിക്കുമ്പോൾ മനസിൽ ചെറിയൊരു ശാന്തത വീഴും.
വേദന പൂർണ്ണമായി അപ്രത്യക്ഷമാകില്ല,
പക്ഷേ അതിന്റെ ഭാരം കുറയും.
അവരെ ന്യായീകരിക്കാൻ വേണ്ടിയല്ല,
പക്ഷേ മനസ്സിലാക്കാൻ വേണ്ടി.
മനസ്സിലാക്കൽ ഒരു മരുന്നാണ്
അത് മറ്റുള്ളവരെ മാറ്റില്ലെങ്കിലും
നമ്മെ ഉള്ളിൽനിന്ന് സുഖപ്പെടുത്തും.
കോപം ചില നിമിഷങ്ങൾക്കുള്ള ശക്തിയാണ്,
പക്ഷേ കരുണ ഒരു ദീർഘകാല ശാന്തിയാകുന്നു.
കരുണ എന്നത് ദുർബലതയല്ല
അത് ഏറ്റവും വലിയ ആത്മബലം തന്നെയാണ്.
നമ്മെ വേദനിപ്പിച്ചവരോട് കരുണ കാണിക്കുമ്പോൾ
അവർക്ക് വേണ്ടിയല്ല അത്
നമ്മുടെ ആത്മാവിന്റെ സമാധാനത്തിനാണ്.
ജീവിതത്തിൽ നമുക്ക് നിയന്ത്രിക്കാൻ കഴിയാത്തത് മറ്റുള്ളവരുടെ പ്രവൃത്തികളാണ്,
പക്ഷേ അവയ്ക്ക് നാം നൽകുന്ന അർത്ഥം എപ്പോഴും നമ്മുടെ കയ്യിലാണെന്നതാണ് സത്യം. നമുക്ക് വേദനയെ ഒരു ശിക്ഷയായി കാണാനും കഴിയും, അല്ലെങ്കിൽ അതിനെ ഒരു പാഠമായി മാറ്റാനും കഴിയും. ഒരിക്കൽ വേദന നൽകിയവരോട് നമ്മൾ ദൂരത്തു നിന്നെങ്കിലും ഒരു മൃദുവായ മനസ്സോടെ നോക്കാൻ കഴിയുമ്പോൾ,അത് നമുക്ക് മനുഷ്യരായി വളരാനുള്ള അടയാളവുമാണ്.
ചിലർ നമ്മെ വേദനിപ്പിച്ചത് അവരുടെ തെറ്റിനാലാകാം,
പക്ഷേ നാം അതിൽ നിന്ന് സമാധാനം കണ്ടെത്തിയേ മതിയാകൂ.
അവിടെയാണ് നമുക്ക് ശാന്തി ലഭിക്കുന്നത് ,
പകയും പ്രതികാരവുമില്ലാതെ പുതിയ സ്വപ്നങ്ങളിലേക്ക് നടന്നു കയറാനാവുന്നത് .
ചിലപ്പോഴെങ്കിലും തിരിഞ്ഞുനോക്കുമ്പോൾ, അന്നവർ വേദനിപ്പിച്ചത് എത്ര നന്നായി എന്നോർത്ത് പുഞ്ചിരിക്കാൻ കഴിയുന്നത് .