📚എന്റെ വിദ്യാലയം📚

രചന : അൻവർ ഷാ ഉമയനല്ലൂർ ✍

ഇന്ന് ഒരു പുതിയ അദ്ധ്യയന വർഷം ആരംഭിക്കുന്നു. [01-06-2026]- പ്രിയപ്പെട്ട എല്ലാ കുഞ്ഞുമക്കൾക്കും നന്മാർദ്രമായ ഹൃദയാശംസകൾ നേരുന്നു.

പാഠപുസ്തകങ്ങൾതൻ ധന്യമാം പുതുമണം
ഹൃത്തിലായേകുന്നതില്ലെ, വിദ്യാലയം
എത്ര വസന്തങ്ങൾ പുഞ്ചിരിച്ചാർദ്രമാ,
യേങ്ങിക്കരഞ്ഞുണർന്നോരോ പ്രഭാതമായ് ?

മിന്നിത്തെളിയുന്നതില്ലേ,മനസ്സിലാ-
യാർദ്ര സ്മിതങ്ങളായോരോ സ്മരണകൾ
ചിന്നിത്തെറിക്കുന്നയെത്ര നീർത്തുള്ളികൾ
വിദ്യാലയസ്മിതാനന്ദമാം പുലരികൾ.

അതിരമ്യ നന്മയായ് ഹർഷാർദ്ര സുദിനമാ-
യിന്നൊരുങ്ങുന്നുദയ ഹൃദയമാം മലരുകൾ
ആദ്യ ദിനത്തിലാഹ്ലാദമായ്, മ്ലാനമായ്
കാവ്യമധുരം പകരുന്നു വർഷവും.

ചിത്രമനമേകുന്നയെത്ര ചങ്ങാതിമാർ
നിത്യമൊരു പുലരിയായുള്ള യദ്ധ്യാപകർ
ഹൃത്തുണർത്താനെത്തുമോരോ ഋതുക്കളും;
ചേർത്തണയ്ക്കുന്നില്ലെ,യിന്നുമാ,ഹൃത്തടം?

പൂത്തുതളിർക്കുന്നുണർവ്വിൻ പ്രഭാതമാ-
യാരമ്യ ഹൃദയോ ദയങ്ങളായിരു മനം
മാതാപിതാക്കളിന്നരുമകൾക്കായ് സ്വയം-
പുലരിയായുണരുന്നു; കതിരായുണർത്തുന്നു.

താലമേന്തുന്നാർദ്രയുദ്യാന സുകൃതിപോൽ
വരവേൽക്കയാണാദ്യ വിദ്യാലയ സ്മിതം
ബാല്യവർണ്ണങ്ങളുല്ലാസ ഹൃദയങ്ങളിൽ
കമനീയ കവിതയുണർത്തുന്നു പുലരിയിൽ.