🪷 ഈ വിജയദശമിനാളിൽ🪷🖋️

രചന : കൃഷ്ണമോഹൻ കെ പി ✍️

ദശപുഷ്പങ്ങൾ ചൂടും കർക്കിടകവും പോയി
ദിശകളെക്കാട്ടീടുന്ന ചിങ്ങപ്പൊന്നോണവും പോയ്
കാത്തു കാത്തിരുന്നോരാ കന്നിമാസത്തിന്നോണം,
കാലത്തിൻ പ്രഭവമായ് നവരാത്രിയുമെത്തീ
കന്നിമാസത്തിന്നോണം തിരുവോണസദൃശമായ്
കൺകളെക്കുളിർപ്പിക്കും
ദശമീ, ദിനത്തിങ്കൽ
കാണാത്ത ജ്ഞാനത്തിൻ്റെ കല്പടവുകളേറാൻ
കാര്യങ്ങളുരുവിട്ടൂ ദേവി ശ്രീ മൂകാംബിക
കാമ്യ, നീ,മനോഹരി കാതര ജന്മങ്ങൾക്കായ്
കാലത്തെക്കാട്ടീടുവാൻ വൈവിധ്യമാർന്നൂ ദിനം
കാത്തുവച്ചീടുന്നോരാ സ്വപ്നങ്ങൾ കാട്ടിടുവാൻ
കാലിക സ്വപ്നങ്ങൾക്കു സന്മാർഗ്ഗം പകരുവാൻ
ലക്ഷ്മിയായ് തൃദിനവും,
ലക്ഷ്യത്തെക്കാട്ടാനായി
ലക്ഷണയുക്തയായി മൂന്നുനാൾ സരസ്വതി
ലീലാലോലുപയായ രുദ്ര തൻ ഭാവങ്ങളിൽ
ലാസ്യ നർത്തനമാടീ പിന്നുള്ള ദിനങ്ങളിൽ
ഞാനൊരുപുല്ലാങ്കുഴൽ,വാദനം നടത്തിയീ
ഞാനെന്ന ഭാവത്തിനെ യകറ്റീ,മഹേശ്വരീ
ജ്ഞാനത്തെ പ്രാപിക്കുവാൻ നവരാത്രികളേകും
ജ്ഞാനസ്വരൂപിണീ നിൻ പദമലർ സ്മരിക്കുന്നേൻ
ജിജ്ഞാസ പെരുകുന്ന മാനവ മനതാരിൽ
ജീവിത സാക്ഷാത്ക്കാരമെന്നും നീ, ജഗന്മാതേ🪷🙏