🌹 പുതുവർഷ സന്ദേശം 🌹

രചന : ബേബി മാത്യു അടിമാലി✍

പുതിയ പ്രതീക്ഷകളും പുതിയ തീരുമാനങ്ങളുമായി പുതിയൊരു വർഷം കൂടി സമാഗതമായി. പോയ വർഷത്തെ നേട്ടങ്ങളും അനുഗ്രഹങ്ങളും ഓർമ്മയിൽ സൂക്ഷിക്കുവാനും കോട്ടങ്ങളും നിരാശകളും ചവറ്റുകൊട്ടയിൽ തള്ളി കളയുവാനും പുതിയ വർഷത്തിൽ നിറമുള്ള സ്വപ്നങ്ങൾ കാണുവാനും ജീവിതം കൂടുതൽ ശരിയായ വഴികളിലൂടെ മുന്നോട്ടു കൊണ്ടുപോകുവാനുമുള്ള ദൃഢ നിശ്ചയത്തോടെ നമുക്ക് മുന്നേറാം .

ഒരു ഡിസംബർ 31-ൽ നിന്ന് ജനുവരി ഒന്നിലേയ്ക്കുള്ള വെറുമൊരു മാറ്റമാണോ പുതിയ വർഷം ? അതോ ആത്യന്തികമായി നമ്മടെ മനോഭാവങ്ങൾക്ക് ഉണ്ടാകേണ്ടുന്ന മാറ്റമോ ?. സാഹചര്യങ്ങൾ എല്ലാം പഴയത് പോലെ തുടരുമ്പോൾ നാം എപ്രകാരം സ്വയം മാറ്റത്തിന് വിധേയപ്പെടുന്നു ഏന്നുള്ളതിനെ ആശ്രയിച്ചിരിക്കും പുതു വർഷത്തെ നമ്മുടെ ജീവിത വിജയം.

ചിന്തകൾ അക്ഷരങ്ങളാകുമ്പോൾ സമൂഹത്തിൽ സമൂല മാറ്റം ഉണ്ടാകും എന്നതിന് രണ്ടു പക്ഷമില്ല . നല്ല പുസ്തകങ്ങൾ വായിക്കുന്നത് ഒരു പരിധിവരെ സ്വഭാവ രൂപികരണത്തിന് നിധാനമായിത്തീരും.

വിസ്മൃതിയിലാണ്ടു പോകുന്ന കഴിഞ്ഞകാല ജീവിത യാഥാർത്ഥ്യങ്ങൾക്കു ചിറകു മുളപ്പിച്ച് സ്വപ്നങ്ങളുടെ അനന്ത വിഹായസ്സിൽ പൊങ്ങിപ്പറക്കുവാൻ നമ്മെ പ്രാപ്തരാക്കുവാൻ വായനയിലൂടയും എഴുത്തിലൂടെയും കഴിയും. നല്ലത് വായിക്കുക , അറിവുകൾ പങ്കുവയ്ക്കുക , പങ്കുവയ്ക്കപ്പെടുമ്പോഴാണ് സമൂഹത്തെ നമുക്ക് മാറ്റിയെടുക്കുവാൻ സാധിക്കുന്നത്. അറിവുകൾ സമൂഹത്തിലേക്ക് പകരപ്പെടുമ്പോൾ മറ്റുള്ളവരും ചിന്തിക്കാൻ തുടങ്ങും. സമൂഹം നന്മയിലേക്ക് വളരുകയും ചെയ്യും.

ബൈബിൾ പറയുന്നതു പോലെ വിളക്ക് കത്തിച്ച് പറയിൻ കീഴല്ല മറിച്ച് പീഠത്തിൻ മുകളിലത്രേ വയ്ക്കേണ്ടത് അപ്പൊൾ പ്രകാശം മറ്റുള്ളവരിലേയ്ക്കും പടരും. നമ്മിൽ പകരപ്പെട്ടിരിക്കുന്ന വെളിച്ചം മറ്റുള്ളവരിലേയ്ക്കു കൂടി പങ്കുവെയ്ക്കപ്പെടണം. മറ്റുള്ളവരെ കൂടി കരുതുവാനും സ്നേഹിക്കുവാനുമുള്ള മനോഭാവം നമ്മിൽ ഉണ്ടാകണം. മാറ്റത്തിന്റെ കാഹളം നമ്മുടെ ഉള്ളിൽനിന്നുതന്നെ മുഴങ്ങട്ടെ. അങ്ങിനെയെങ്കിൽ നാം മാറും , സമൂഹവും മാറും ലോകവും മാറും .

അതുതന്നെയാകട്ടെ ഈ പുതു വർഷത്തിൽ പങ്കുവെയ്ക്കാവുന്ന എറ്റവും നല്ല സന്ദേശം.
എല്ലാ അക്ഷര സൗഹൃദങ്ങൾക്കും സ്നേഹപൂർവ്വം പുതുവത്സരാശംസകളോടെ…🙏🙏🙏🌹🌹🌹