🫧അഴകിയലും പുഴ അവശതയോടെ🫧

രചന : കൃഷ്ണമോഹൻ കെ പി ✍

അധിനിവേശങ്ങളാൽ ആത്മാവു നഷ്ടമായ്
അകലേയ്ക്കൊഴുകുന്ന പുഴയാണു ഞാൻ
അവിടെൻ്റെ നാദത്തിന്നൊലികൾ നിലച്ചുപോയ്
അവിടെൻ മനവും മരച്ചു പോയീ
അലയാഴിതന്നിലെ തിരയിൽ ലയിക്കുവാൻ
അലസമാം ഗമനം ഞാൻ ചെയ്തിടുമ്പോൾ
അരികത്തണഞ്ഞൊരു കുളിർ കാറ്റായ് മെല്ലെയെൻ
അധരത്തിൽ നീയൊന്നു ചുംബിക്കുമോ
അനുരാഗവിവശയല്ലെങ്കിലും ഞാനൊരു
അളിവേണിയല്ലയതെന്നാകിലും
അവനീസുതർക്കുള്ള തെളിനീരുമായി ഞാൻ
അവതീർണ്ണയായീ നിനക്കു മുന്നിൽ
അവിടെയാണധിനിവേശത്തിൻ്റെ ക്രൂരത
അഴുക്കായൊഴുക്കിയെൻ മാറിടത്തിൽ
അമരുന്നകൈവിരൽ ചെളിയാൽ വരച്ചിട്ട
അകൃതങ്ങൾ കണ്ടു കരയുന്നതും💧