🪂ആകാശമുണരുമ്പോൾ🪁

രചന : കൃഷ്ണമോഹൻ കെ പി ✍

അംബരത്തിൻ്റെ ആരാമ സീമയിൽ
അംബുജത്തിൻ്റെ ആത്മപ്രകാശമായ്
അഗ്നിവർണ്ണമോടുജ്ജ്വലതേജസ്സിൽ
അർക്കനെത്തിച്ചിരിക്കുന്ന നേരമായ്

ചിത്രഭാനുവിൻ പുഞ്ചിരി കണ്ടിതാ
ചിത്തമാകെത്തുടിക്കുന്നു കാലമേ
ചന്തമേറുന്നു ഭൂമിക്കു മേല്ക്കുമേൽ
ചിന്തകൾക്കോ ചിറകു മുളയ്ക്കുന്നൂ

ഭംഗിയാർന്നുള്ള ചിത്രശലഭങ്ങൾ
ഭംഗമെന്നിയേ ചുറ്റിപ്പറക്കുന്നു
ഭാവദീപ്തി പരക്കുന്ന വാനിലായ്
ഭാവി തന്നുടെ സ്വപ്നം വിളയുന്നു

നന്മ തന്നിലെ സന്മനോഭാവത്താൽ
തിന്മ തന്നുടെ കോട്ടം നികത്തും പോൽ
ഉണ്മയോടെയിരുട്ടിനെ മാറ്റിയാ
കർമ്മചാരിയോ മന്ദഹസിക്കുന്നൂ🌹