🩸 കണികണ്ടുണരാം കണ്ണൻ്റെ കുസൃതികൾ🙏

രചന : കൃഷ്ണമോഹൻ കെ പി ✍

കണികാണാൻ കണ്ണൻ്റെ കരിനീലവിഗ്രഹം
കമനീയമായിട്ടലങ്കരിച്ച്
കരതാരിലെത്തുന്ന പുഷ്പ ഫലങ്ങളും
കരുതലോടങ്ങു നിരത്തി വച്ച്
കണ്ണൻ്റെ ലീലാമൃതങ്ങളെയോർത്തങ്ങു
കൺതുറക്കുന്നീ വിഷു ദിനത്തിൽ
കണി വച്ചതില്ലയെൻ ഹൃദയത്തിൽ വാഴുന്ന
കമനീയരൂപനാം ശ്രീകൃഷ്ണനെ
കഥയൊന്നുമോർക്കാതെ കരളിൽക്കരുതുന്ന
കവിതയായെന്നും കുറിച്ചിട്ടു ഞാൻ
കണ്ണനെക്കാണുവാൻ കണി വേണമോ മന:
കണ്ണിലാ രൂപം പതിഞ്ഞു പോയീ
കസവുള്ള മഞ്ഞപ്പുടവയണിഞ്ഞുമാ
കാനനമാലയണിഞ്ഞു നില്ക്കും ……
കണ്ണനെ ചിത്തത്തിലെന്നും പ്രതിഷ്ഠിച്ചു
കണി കാണും ഭക്തനോ മുഗ്ദ്ധനാകും
കൃഷ്ണാ മുകുന്ദാ ജനാർദ്ദനാ മാധവാ
കൃത്യങ്ങളെല്ലാമേ കൃത്യമാകാൻ
കർത്തവ്യകാരിയ് മാനസതാരിങ്കൽ
കണ്ണാ, വിശുദ്ധതയേകിടൂ നീ
കാരണരൂപിയായ് പുഞ്ചിരി തൂകുന്ന
കാർവർണ്ണൻ തന്നുടെ ലീലകളിൽ
കാമ്യതയോലുന്ന വേണു നാദത്തിൻ്റെ
കാലാതിവർത്തിയാം രാഗങ്ങളായ്
കേശവാ,ഭാവനിബദ്ധമാം നിൻ രാഗാർദ്ര
കേവലസംഗീത നിർഝരിയാൽ
കാലത്തിൻ്റുന്മാദനാദം ശ്രവിയ്ക്കട്ടെ
കാലാന്തരം മാറുമീ ദിനത്തിൽ …