🧤കനവിലെത്തിയ കരുണാകരൻ കണ്ണൻ🧤

രചന : കൃഷ്ണമോഹൻ കെ പി ✍

കനവിലുമെത്തുന്നൂ കായാമ്പൂവർണ്ണനായ്
കണ്ണനാമുണ്ണിയെൻ ഹൃത്തടത്തിൽ..
കനിവോലുമക്ഷികൾ, കൃഷ്ണ വർണ്ണത്തോടെ
കതിരുകളേകുന്നു, മുക്തി തൻ്റെ
കരതാരിൽ മുരളികയേന്തി നില്ക്കുന്നവൻ
കരളിൽ ധ്വനി മീട്ടും ഗീതവുമായ്
കരുണാമൃതനവൻ കാളിന്ദി തന്നിലെ
കമനീയ ഓളങ്ങൾ നാദമാക്കീ….
കറുകറുത്തുള്ളൊരാ മേനിയിലാകവേ
കലയുടെ സങ്കല്പ ദീപ്തിയെത്തീ
കരചരണങ്ങളിൽ വേദാന്തവേദ്യമാം
കവിതയെ സ്വാംശീകരിച്ചു നില്പൂ
കഞ്ജബാണൻ തൻ്റെ പിഞ്ചു ബാണങ്ങളെ
കണ്ടവരില്ലായതെന്നാകിലും. :
കണ്ണൻ്റെ മന്ദസ്മിതത്തിൻ്റെ ശോഭയിൽ
കണ്ടെത്തിടാംകാമ്യഭാവങ്ങളെ…
കലകൾക്കു ശ്വാസത്താൽ ജീവൻ പകർന്നിടും
കരളിൻ്റെ സ്പന്ദമാം വേണുവേന്തി
കരുണാമൃതനായ കണ്ണനുറക്കത്തിൽ
കൃതകൃത്യമാക്കിയെൻ മാനസത്തെ…….🌹