രചന : സുരേഷ് പൊൻകുന്നം ✍
കവിത നിൻ കയ്യിൽ നിന്നും
വഴുതി മാറുന്നു,
അത് നീ അറിയുന്നില്ലാ…
നീ,
നിന്റെ ചിറകിൽ
ഒളിപ്പിച്ച് വെച്ച കവിത
കവനഭാരം കുടഞ്ഞെറിഞ്ഞ്
ഒരു നവോഢയെപ്പോൽ
കുളിച്ച്,
വളിച്ച കുറി തൊടാതെ
ഇതാ…
ദീപസ്തംഭം മഹാശ്ചര്യം
എന്ന് ചൊല്ലാതെ
ഉയർത്തെഴുന്നേൽക്കുന്നു,
നീ വൃത്തവും
അലങ്കാരവും അലങ്കാരശാസ്ത്രവും
കൊണ്ട് പൊതിഞ്ഞ് സൂക്ഷിച്ച
കവിത
ഒരു നവവേശ്യയെപ്പോൽ
ജനങ്ങൾക്കായ് തെരുവിലാണിന്ന്
കവിതയുടെ കൂത്ത്
കൂത്തമ്പലത്തിലല്ല,
തെരുവിൽ, ജനങ്ങളോടൊപ്പം.
