🌈 തുല്യതയുടെ തമ്പുരാൻ🌈💖

രചന : അൻവർ ഷാ ഉമയനല്ലൂർ✍

ഠാ-വട്ടം കൊണ്ടളക്കുവാനുള്ളത-
ല്ലത്യുദാരനാം ദൈവത്തെയീവിധം
കനിവിന്നപാര വർഷമേകുന്ന വ-
നില്ല! വേർതിരുവകളതിരുക;ളന്തരം

ചിന്തോദയങ്ങളേകീടണം, ബന്ധുര-
മാകട്ടെയേവം വിചാരമിന്നാരിലും
തൻമതംമാത്രം ഉദാത്തമെന്നോർക്കയാ-
ണോരോ മനുഷ്യരു; മില്ല! ചിന്താർദ്രകം.

ഉടയവനാവില്ല! യിതുകണ്ടിരിക്കുവാൻ
ഉദയമൊന്നേകാൻ കൊതിച്ചിരിപ്പാണവൻ
ഒന്നായ്ത്തി ളങ്ങുന്ന താരാഗണങ്ങളാ-
യുള്ളിൽ നിറയട്ടെ വിശ്വാസമേവതും.

സമയമാ,യിനിയുമുണർന്നു ചിന്തിക്കാതെ,
ദൈവമാരെന്നറിയാതേ, പരസ്പരം-
തർക്കിച്ചുയർത്തിപ്പറഞ്ഞു നാം തങ്ങളിൽ
വിലകുറച്ചീടുന്ന പരന്റെ ദൈവകം.

പാരിന്റെ ചിത്രമൊന്നോർക്കുക!യാരുമേ-
യറിയാതിരിക്കുന്നതിൽ സവിശേഷത;
മർത്യതേയവ നില്ല;ജാതി-മതാന്ധത;
സത്യമറിയാത്തതാണിന്നു മൂഢത.

ചന്ദ്രനാ,യോരോ ഗ്രഹങ്ങളാ,യരുവിയാ-
യേവമീയാരാമ സൂനങ്ങളായവൻ
പുഞ്ചിരിച്ചോതുന്നു; മർത്യോദയത്തിനായ്
സൃഷ്ടിച്ചതാ,ണീ പ്രപഞ്ചമെ-ന്നെങ്കിലും;

അറിയുന്നതില്ല! നാം കാതോർത്തിടുന്നില്ല,
കനിവിന്റെ തീരം പകരുന്ന സുസ്വനം
നന്മാർദ്രമാം പ്രദീപങ്ങളായ് നയനങ്ങൾ –
നൽകിയെന്നാകിലും, കണ്ടില്ല: പാരിടം.

ഗിരിനിരയായ് കഠിന ചിഹ്നങ്ങളേകിയോ-
നുദയാർദ്രസാരമാം പുലരികളേ കിയോൻ
സഹ്യനായ് കാവലിൻ ചിന്തയേകുന്നവൻ
സഹനമായ് ധരണിയെപ്പരി ഗണിക്കുന്നവൻ

തുല്യരായ്ക്കാണുവാനോതുന്നു വാനമായ്,
കാലമായ്, കവനപ്പുഴകളാ,യെങ്കിലും
മാതൃകോദാര മനസ്സുണർത്താതെ:യി_
ന്നവഗണിക്കുന്നുൾമിഴിതുറക്കാത്തവർ.

താതനോടമ്മയോ,ടാ ദിവ്യ ഗുരുവിനോ-
ടുലകിനോടുള്ള കടപ്പാടു തീർക്കാതെ,
പ്രാർത്ഥിച്ചു നേടാൻശ്രമിക്കുന്നു സ്വാർത്ഥരായ്;
തേടുന്നുദാരമായ് തിരു വരങ്ങൾക്കുമായ് ;

നേടാൻകഴിയാതിരിക്കെ -യാ,ച്ചതിയനാം
ദൈവമില്ലെന്നുടൻ പരിതപിക്കുന്ന വർ
ഓർത്തു വണങ്ങുക! മാതൃപാദങ്ങളിൽ
ഒട്ടറിഞ്ഞീടാത്ത പിതൃസ്പന്ദനങ്ങളിൽ;
ഗുരുവര നയന ദീപങ്ങൾക്കു മുമ്പിലും

എല്ലാം പ്രതീകങ്ങളായ് തെളിയുന്നവർ
ഉൾനയനങ്ങളുണർത്തിത്തരുന്നവർ
കണ്ടിരിക്കേ നാം വിലമതിക്കാത്തവർ.
തുല്യരാണേവരുമെന്നുണർത്തുന്നവർ.

കാലമേ, മാനവ ലോകമേ, കേൾക്കുക!
സുരസ്വരം: വിലമതിയാത്തനിൻ ഹൃത്തടം
തുല്യതാളത്തിലുയർത്തുന്ന സ്പന്ദനം
ദൈവാർദ്ര തുല്യ സ്നേഹത്തിൻ തിരുസ്വരം…🌈
💖💖💖