🌈 ഓർക്കുകയോരോമനുഷ്യനും📚🦜♥️

രചന : അൻവർ ഷാ ഉമയനല്ലൂർ✍️.

ഓരോന്നുമേറേ വിശിഷ്ട,സുവിശേഷമായ്
ഓർക്കേണ്ടതാണിന്നനുഗ്രഹവർഷങ്ങൾ
ഓതുന്നതിൻ മഹത്വം മർത്യമിഴികളും
ഓരോ ഹൃദയത്തുടിപ്പും പരസ്പരം.

ഓട്ടപ്രദക്ഷിണമല്ലിതെന്നുള്ളിലായ്
ഓങ്കാരനാദമുണർത്തിയ ഭൂതലം
ഓമൽപ്രഭാതമായേകുന്ന സുസ്മിതം
ഓജസ്സോടെന്നു മുണർത്തുന്ന ചിന്തകം.

ഓർക്കേണ്ടതാണേതു മർത്യനുമനുദിനം
ഓതിരത്താലൊഴിഞ്ഞീടാൻശ്രമിക്കിലും
ഓർക്കാപ്പുറത്താണ് ജീവന്റെ സ്പന്ദനം
ഓതിനിർത്തുന്നതാ മഹനീയഹൃത്തടം.

ഓമനത്തം തുളുമ്പുന്നെത്ര ശൈശവം
ഓരോ നിമിഷവും പൊലിയുമിപ്പാരിടം
ഓർമ്മപ്പെടുത്തു ന്നുലകിലീ,ജീവിതം
ഓരാതിരിക്കുവോർക്കാ,മൂല്യബോധകം.

ഓഷ്ഠകത്താലുണർത്തേണ്ടത,ല്ലാ ദിവ്യ-
ഓജസ്യഭാവമേ കുന്നതാം തമ്പുരാൻ
ഓജിഷ്ഠഹൃത്തടം തന്നുദയമേകയാൽ
ഓർത്തു വന്ദിക്ക!യിതു ശുഭധന്യ ജീവിതം.

ഓലപ്പുരകൾനിറഞ്ഞ ചില കാലങ്ങൾ
ഓരോ തലമുറകൾക്കനുയോജ്യമായ്
ഓലക്കമേകുന്ന വൻ മർത്യഹൃദയങ്ങൾ
ഓമനിച്ചൊരുമ തൻ കാവ്യംരചിപ്പവൻ

ഓടക്കുഴൽനാദമെന്നപോൽ നിത്യവും
ഓമായകാവ്യമായെഴുതുകയല്ല! ഞാൻ
ഓർമ്മപ്പെടുത്തു കയാ,ണാർദ്ര കിരണമായ്
ഓഷധിയെന്നപോൽ മനശുദ്ധിയേകുവാൻ.

ഓഷധീശാഗ്നിനാളംപോൽ പൊലിഞ്ഞിടാം
ഓരോ മനുഷ്യായുസ്സിന്റെ മഹത്വവും
ഓലക്കമണ്ഡപത്തിൽനാ,മിരിക്കിലും
ഓലപ്പുരയിൽ വസിക്കയാണെങ്കിലും.

ഓർത്തുജീവിക്ക! സമൂഹമേ, പാരിടം;
ഓർമ്മപ്പെടുത്തുന്നതാം ദിവ്യകരതലം
ഓരോ തളിരായുണർത്തുന്ന ജീവിതം
ഓരാതെയാ, മഹാസത്യത്തെ വാഴ്ത്തണം.

ഓമലാളിൻ സ്നേഹപുലരി പോ,ലതിലുപരി
ഓളങ്ങളണയാത്ത കായൽപ്പരപ്പു പോൽ
ഓരോനിമിഷവുമോർക്ക!യനുഗ്രഹം;
ഓതുന്നതില്ലേ,യാ തളരാത്ത ഹൃത്തടം ?