🌹🌹 ഉഷസ്സിൽ വിടരും പൂക്കളോടൊപ്പം🌹🌹

രചന : കൃഷ്ണമോഹൻ കെ പി ✍️

തുമ്പപ്പൂ തന്നുടെ വെണ്മയെക്കണ്ടിട്ടാ ,
തൂവാന മേഘം വിളറിടുന്നു
മുക്കുറ്റി പേറുന്ന മഞ്ഞ നിറം കണ്ടു,
മുഗ്ദ്ധയായ് നില്ക്കുന്നു, പൊൻവെയിലും……
ശംഖുപുഷ്പത്തിൻ്റെ നീല നിറം പാർത്ത്,
ശങ്കയാർന്നീടുന്നു, നീലാംബരം …..
ചെമ്പരത്തീയുടെ,ചോപ്പു നിറം കണ്ടു,
ചെമ്മാനം, തന്നെ മറന്നു നില്പൂ ,…..
കനകാംബരത്തിൻ്റെ ശോഭ കണ്ടങ്ങനെ,……
കമനീയ പ്രകൃതിയോ പുഞ്ചിരിപ്പൂ…….
നീലാംബരവും ഈ നീലക്കടലുമോ,……….
നീളുന്ന സ്വപ്നങ്ങളേന്തി നില്പൂ
കണ്മുന്നിലുള്ളൊരീ കാഴ്ചകൾ കാണാതെ………
കാണാത്ത സ്വർഗ്ഗത്തെത്തേടുന്നു നാം ……,……🌹🌹