രചന : ബി സുരേഷ്കുറിച്ചിമുട്ടം✍️.
നാട്ടുപാതതാണ്ടിയിന്നൊരു സവാരിപോകേണം
ഇരുചക്രമാമീസൈക്കിളിൽനാടുചുറ്റേണം
നാളെയെൻ്റെകളിക്കൂട്ടുകാരെകൂട്ടിടേണം
മേലെയേറിപാഞ്ഞിടാനറിയില്ലതുകഷ്ടം!
വയൽനിറഞ്ഞുവിളഞ്ഞുനെൽമണികൾ
പാടനടുവിൻപ്പാതയിലൂടിന്നുഞാൻ
പാകമാകാത്തൊരിശകടമേറ്റിപ്പോകയാണ്
പാതിപാതിചവിട്ടിപ്പാഞ്ഞിടുകയാണുഞാൻ!
പുലരിതാണ്ടിവന്നിടേണമീ പ്പാതയിൽനാളെ
നേരമേറിപ്പോയീടുകിൽ വെന്തുപോകുംദേഹം
വെയിൽമൂത്തുമൂത്തു ചൂടേറിപ്പോയിടുന്നു
കരുതണംനാളെക്കുടിനീരുമായിവന്നിടാം!
ഇടച്ചവിട്ടുമാറ്റി,യിരുന്നുച്ചവിട്ടി നീങ്ങണം
ഇനിധൈര്യമേറിടുന്നുണ്ടെന്നിലേറെയായ്
വീണുരുണ്ടുമുറിഞ്ഞുപാടുമാഞ്ഞിടുമല്ലോ
മോഹമുള്ളിൽ മുളച്ചുപൊന്തിത്തളിർത്തു!
എത്രകഠിനമെങ്കിലും വിട്ടുപോകുകില്ല
തട്ടുമുട്ടുശീലമായൊട്ടുനാളായതിൻ
മട്ടുമാറിതട്ടുമറന്നുമുട്ടൻവണ്ടിയിലേറി
ഒട്ടുനാളിൻമോഹമതെല്ലാമിന്നുസ്വന്തമായ്!!
