🌋സശ്രദ്ധം തിരുത്തിയ അശ്രദ്ധ⛰️

രചന : കൃഷ്ണമോഹൻ കെ പി ✍️

സശ്രദ്ധം തിരുത്തിയ അശ്രദ്ധയോടു മെല്ലെ
അബദ്ധത്തെ സുബദ്ധമായ് മാറ്റിടുന്നോർ നാം
സങ്കീർത്തനങ്ങൾ പോലെപ്പിന്നെ ഏറ്റങ്ങു പാടീടുമാ
അബദ്ധങ്ങൾ പിന്തുടരും മൂഢ ജന്മങ്ങൾ
സ്വരലയമുതിർക്കുന്ന അലകളാൽ സമൃദ്ധമാം
അലയാഴി മുഷിയുമ്പോൾ വൻ തിരയുണ്ടാം
സമവായത്തോടെ നീങ്ങും മനുജർക്കും ചിലപ്പോഴാ
അലശണ്ഠയുയർന്നീടും മനസ്സിനുള്ളിൽ
സരള ചിന്തകളോടെ തപസ്സുകളനുഷ്ഠിക്കും
അതുല്യരാം ഋഷികൾക്കും തപം തോന്നിടാം
സമരസമതിനോടും ചെയ്തു തന്നെ മുനിമാരീ
അറിവിൻ്റെ സമുദ്രത്തെക്കാണിച്ചു തന്നൂ
സലിലത്തിലലിയുന്ന ലവണത്തെപ്പോലെ നമ്മൾ
അവികല സങ്കല്പത്തിൽ മുഴുകിയെന്നാൽ
സകലർക്കും സുഖമേകും പ്രകൃതി തൻ ഔന്നത്യത്തെ
അവനിയിൽ വസിക്കുന്നോർ അനുഭവിക്കും
സ്വരരാഗസുധ തൂകും അമരമാം സംഗീതത്തിൻ
അലകൾ തന്നൊലികേട്ടു രസിച്ചിടുമ്പോൾ
അഭിരാമക്കിനാക്കൾ തൻ അനവദ്യ
സൗന്ദര്യത്തിൽ മതിമറന്നീടും ലോകം,
അഞ്ജലി കൂപ്പും…..🙏