രചന : സുജിമോൾ മാരാരി ✍️
വിശ്വാസം
ഒരു വാക്കല്ല…
തകർന്ന ഹൃദയത്തിന്റെ
അവസാന ശ്വാസമാണ്.
വഞ്ചനയുടെ മുറിവുകളിൽ
പുണ്യജലം പോലെ
നിശബ്ദമായി വീഴുന്ന
ഒരു പ്രതീക്ഷയുടെ തുള്ളി.
എല്ലാം നഷ്ടപ്പെട്ട നിമിഷത്തിലും
“ഇനിയും ഒരു പുലരി ഉണ്ടാകും”
എന്ന് പറയുന്ന
അദൃശ്യ ശബ്ദം.
വിശ്വാസം പഠിപ്പിച്ചത് ജീവിതം തന്നെയാണ്
വീണു വീണു എഴുന്നേറ്റ്
നടക്കാൻ പഠിച്ച കാലുകൾക്ക്.
ചിലർ ചതിക്കും,
ചിലർ മറക്കും,
ചിലർ തകർക്കും…
എന്നാലും
നമ്മളെ ജീവനോടെ പിടിച്ചുനിർത്തുന്നത്
ഈ ഒറ്റ വാക്ക് മാത്രം
വിശ്വാസം.
കാരണം
വിശ്വാസമുള്ളവൻ
ഒരിക്കലും തോൽക്കില്ല…
അവൻ വൈകിയാലും ജയിക്കും..