😂 അക്ഷര സൗഹൃദം😂

രചന : ഹരി കുങ്കുമത്ത് ✍️

എഴുതി വയ്ക്കുന്നു ശീർഷകത്തിൽ കീഴെ
മനസ്സിലീണം വിടർത്തിയ വാക്കുകൾ.
പകലു രാവുകളാഴ്ചകൾ നീളുന്നു
മറുവശത്താരു വായിച്ചു നോക്കുന്നു!
മുകളിലാകാശമന്ധതാമിസ്രത്തെ
ചെറിയ നക്ഷത്ര ദീപ്തിയിൽ മായ്ക്കവേ
ഇരുളടഞ്ഞുള്ള വായനക്കാരുടെ
മനസ്സു വായിക്കയാണു ഞാൻ നിഷ്ഫലം!
ഇടവിടാതെത്ര കാവ്യങ്ങൾ,ദീർഘമാം
കഥകൾ, ചിത്രങ്ങൾ, ചോദ്യ നർമ്മോക്തികൾ..
ഇവയിലൂടൊക്കെ ലൈക്കു പായിക്കവേ
ഇരുപതായിരം പോയിന്റു നേടിപോൽ!!!!
കഥയിതെത്രമേൽ ബാലിശം; പത്തുപേ –
രരിയ സൗഹൃദം കാണിച്ചു മിണ്ടിയോ!
സ്വരമടക്കട്ടെ യക്ഷരക്കൂട്ടമേ
പെരിയ ലാൽസലാം ലാൽസലാം ലാൽസലാം🤗