📙️ മഹാകവി പന്തളം കേരളവർമ്മ ഓർമ്മയായിട്ട് 107 വർഷം.

രചന : കലാഗ്രാമം ബുക്ക്‌ ക്ലബ്ബ് ✍

കഴിഞ്ഞ കാലഘട്ടങ്ങളിൽ സ്കൂൾ കാലത്ത് കേട്ട ഇന്നും ഓർമ്മയിൽ തങ്ങി നില്ക്കുന്ന
✒️ ദൈവമേ കൈതൊഴാം കേള്‍ക്കുമാറാകണം
പാവമാനെന്നെ നീ കാക്കുമാറാകണം…. ഉൾപ്പെടെ ഗൃഹാതുരത്വവും മനസ്സിന് സന്തോഷം നൽകുന്ന ഒരുപിടി കവിതകളുടെ – ഗാനങ്ങളുടെ രചയിതാവായ… പ്രസിദ്ധമായ ഒട്ടേറെ ബാലകവിതകളും രചിച്ച ‘പദംകൊണ്ടു പന്താടുന്ന പന്തളം’ എന്നറിയപ്പെട്ട മഹാകവി പന്തളം കേരളവർമ്മ.

1879 ജനുവരി 22-ന് (കൊല്ലവർഷം 1054 മകരം 10, മകയിരം നക്ഷത്രത്തിൽ) പാണ്ഡിത്യത്തിന്റെ പാരമ്പര്യമുണ്ടായിരുന്ന പന്തളം വലിയ കോയിക്കലിന്റെ വടക്കേടത്തുശാഖയില്‍ പുതുപ്പള്ളി തൃക്കോണമംഗലം ദേശത്തു പെരിഞ്ചേരി ഇല്ലത്തെ വിഷ്ണു നമ്പൂതിരിയുടെയും അശ്വതി തിരുന്നാള്‍ തന്വംഗി തമ്പുരാട്ടിയുടെയും മകനായി ജനനം. പാരമ്പര്യ രീതിയിലുള്ള സംസ്‌കൃത വിദ്യാഭ്യാസം നേടി. പന്തളത്ത്‌ അച്യുതവാരൃർ – അവിട്ടം തിരുനാള്‍ രാമവര്‍മ്മ തമ്പുരാൻ – തൃക്കേട്ടനാള്‍ വീരകേരളവര്‍മ്മ – അത്തം തിരുനാള്‍ ഗോദവര്‍മ്മ – തുറവൂര്‍ നാരായണ ശാസ്ത്രികൾ എന്നിവരിൽ നിന്നും വിവിധ വിഷയങ്ങളിൽ അറിവ് നേടി. 12-ാം വയസ്സില്‍ സംസ്‌കൃത കവിതകളും 19-ാം വയസ്സില്‍ മലയാള കവിതകളും എഴുതിത്തുടങ്ങി. 20-ാം വയസ്സില്‍ കവി എന്ന നിലയിൽ അറിയപ്പെട്ടു കഴിഞ്ഞിരുന്ന അദ്ദേഹത്തിന് കൊച്ചിരാജാവ്‌ ‘കവിതിലകന്‍’ എന്ന സ്ഥാനം നൽകി

തിരുവിതാംകൂര്‍ മഹാരാജാവ് ശ്രീമൂലം തിരുനാളിന്റെ വിദ്വല്‍ സദസ്സില്‍ അംഗം എന്ന നിലയില്‍ അദ്ദേഹത്തിന്‌ ‘വര്‍ഷാശനം’ (അടുത്തൂൺ – ആന്വിറ്റി – Annuity) നൽകിയിരുന്നു.
1901-ല്‍ പന്തളം കൊട്ടാരത്തിലെ ഭരണകര്‍ത്താവായി. 1905-ല്‍ ഒടുവില്‍ കുഞ്ഞികൃഷ് മേനോന്റെ സഹോദരി അമ്മുക്കുട്ടിയമ്മയെ വിവാഹം കഴിച്ചു.
1904 നവംബര്‍ 16 ന് കവനകൗമുദി എന്ന പദ്യപാക്ഷികം സ്വന്തം ഉടമസ്ഥതയിലും പത്രാധിപത്യത്തിലും ആരംഭിച്ചു. അതില്‍ അറിയിപ്പ് – പരസ്യം – മുഖപ്രസംഗം – വാര്‍ത്ത – ഗ്രന്ഥനിരൂപണം തുടങ്ങി എല്ലാ ഇനങ്ങളും പദ്യത്തിലായിരുന്നു. അതിന്റെ മുഖപ്രസംഗത്തില്‍ അദ്ദേഹം സാമൂഹിക – രാഷ്ട്രീയ – സമകാലിക സംഭവങ്ങളും ഉള്‍പ്പെടുത്താന്‍ ശ്രദ്ധിച്ചിരുന്നു. ദ്രുതകവിതാ രചനയില്‍ സമര്‍ഥനായിരുന്ന കേരളവര്‍മ കവനകൗമുദിയില്‍ കൂട്ടു കവിതകള്‍ക്ക് പ്രത്യേക പ്രാധാന്യം നല്‍കി. പ്രസിദ്ധമായ ഒട്ടേറെ ബാലകവിതകളും പ്രസക്തമായ പല വിഷയങ്ങളെക്കുറിച്ചും മുഖപ്രസംഗങ്ങളും എഴുതി. തമ്പുരാന്റെ നിര്യാണ ശേഷവും അതിന്റെ പ്രസിദ്ധീകരണം തുടർന്നു.

1914 ല്‍ തിരുവനന്തപുരം SMV ഹൈസ്‌കൂളില്‍ ഭാഷാധ്യാപകനായതോടെ കൈതമുക്കില്‍ സ്വന്തമായി വീടുവാങ്ങി താമസമുറപ്പിച്ചു.
1979-ൽ ജന്മശതാബ്ദി യോടനുബന്ധിച്ച് പന്തളം കേരളവർമയുടെ തിരഞ്ഞെടുത്ത കൃതികൾ’ 2 വാല്യങ്ങളിലായി പ്രകാശിപ്പിച്ചു. 2009-ൽ കേരള സാഹിത്യ അക്കാദമി പന്തളം കേരളവർമ്മയുടെ പ്രധാന കവിതകൾ (സമാഹരണം – പഠനം: ഡോ. കെ.എസ്. രവികുമാർ.) എന്ന പുസ്‌തകവും പ്രസിദ്ധീകരിച്ചു.
1919 ജൂണ്‍ 11ന് (1094 ഇടവം 28) 40-ാം വയസ്സില്‍ അന്തരിച്ചു.

കൃതികൾ : രുഗ്മാംഗദ ചരിതം, മഹാകാവ്യം, വിജയോദയം കാവ്യം, കഥാകൗമുദി, വഞ്ചീശ ശതകം, മാർത്താണ്ഡ ദേവോദയം, സൂക്തിമാല, വേണീസംഹാരം, ദൂതവാക്യം, ശബരിമല യാത്ര, ശുംഭ നിശുംഭവധം, ഭുജംഗ സന്ദേശം, ഓട്ടൻതുള്ളൽ, ഭാഗീരഥി വഞ്ചിപ്പാട്ട്,
പന്തളം കേരളവർമ്മയുടെ സ്മരണാർത്ഥം ‘പന്തളം കേരളവർമ്മ സാഹിത്യ സമിതി’ എന്ന പേരിൽ ഒരു സമിതി രൂപവൽക്കരിക്കപ്പെടുകയും കവിതാ രംഗത്തെയും മാധ്യമരംഗത്തെയും പ്രമുഖരെ ആദരിക്കുന്നതിനായി വ്യത്യസ്ത പുരസ്കാരങ്ങൾ ഏർപ്പെടുത്തുകയും ചെയ്തു. ‘മഹാകവി പന്തളം കേരളവർമ്മ പുരസ്കാരം’ എന്നാണ് ഈ പുരസ്കാരം അറിയപ്പെടുന്നത്. ശ്രീകുമാരൻ തമ്പി, ഒ.എൻ.വി. കുറുപ്പ്, കെ. അയ്യപ്പപ്പണിക്കർ, വിഷ്ണു നാരായണൻ നമ്പൂതിരി, സച്ചിദാനന്ദൻ, കടമ്മനിട്ട രാമകൃഷ്ണൻ, അക്കിത്തം അച്യുതൻ നമ്പൂതിരി, സുഗതകുമാരി എന്നിവർക്കും 2026 ലെ പുരസ്കാരം ഒ.വി. ഉഷയുടെ പ്രിയകവിതകൾ എന്ന കാവ്യസമാഹാരത്തിന് ലഭിച്ചു. 25000 രൂപയും ശില്പവും പ്രശസ്തിപത്രവും സമ്മാനമായി നൽകുന്നത്.

✒️ ദൈവമേ കൈതൊഴാം കേള്‍ക്കുമാറാകണം പാവമാമെന്നെ നീ കാക്കുമാറാകണം എന്നുള്ളില്‍ ഭക്തിയുണ്ടാകുമാറാകേണം
നിന്നെ ഞാനെന്നുമേ കാണുമാറാകേണം നേര്‍വഴിക്കെന്നെ നീ കൊണ്ടുപോയീടണം നേര്‍വരും സങ്കടം ഭസ്മമായീടണം ദുഷ്ടസംസര്‍ഗ്ഗം വരാതെയായീടണം ഇഷ്ടരായുള്ളവര്‍ തോഴരായീടണം നല്ലകാര്യങ്ങളില്‍ പ്രേമമുണ്ടാക്കണം നല്ലവാക്കോതുവാന്‍ ത്രാണിയുണ്ടാക്കണം കൃത്യങ്ങള്‍ ചെയ്യുവാന്‍ ശ്രദ്ധയുണ്ടാക്കണം സത്യം പറഞ്ഞിടാന്‍ ശക്തിയുണ്ടാക്കണം…
പണ്ടു കാലങ്ങളിൽ സ്കൂളുകളിൽ പാടിക്കേട്ട ഈ പ്രാർത്ഥനാഗീതം എത്ര പേർ ഓർമ്മിക്കുന്നുണ്ട്…?
ആരുടേതാണീ വരികൾ എന്ന് ആർക്കെങ്കിലും അറിയുമോ…?
ഈ വാക്കുകളിലെ നൈർമ്മല്യവും ദൈവീകത്വവും തിരിച്ചറിഞ്ഞു ആരെങ്കിലും ആ കവിയെ കണ്ടെടുത്തുവോ…?

ഏതെങ്കിലും അദ്ധ്യാപകൻ പഠിപ്പിച്ചിരുന്നുവോ…? ഓർക്കുന്നതേയില്ല.
കാരണം ചില സമയത്ത് വരികൾക്കും സാഹിത്യത്തിനും മാത്രമാണു പ്രസക്തി എഴുത്തുകാരൻ അപ്രത്യക്ഷനായിരിക്കും.ഈ പ്രാർത്ഥനാഗീതം രചിച്ച അദ്ദേഹം നമ്മെ വിട്ടുപിരിഞ്ഞിട്ട് 107-ാം പിന്നിട്ടിട്ടും അദ്ദേഹത്തിന്റെ ഓർമ്മയ്ക്കായി ഇന്നെങ്കിലും ഒരിക്കലെങ്കിലും ഒന്നുറക്കെ ചൊല്ലുകയെങ്കിലും വേണ്ടേ…?

വായനക്കൂട്ടം (കലാഗ്രാമം ബുക്ക്‌ ക്ലബ്ബ് )