🌂 വിശാഖം, വിശ്വത്തിനോട്🌂

രചന : കൃഷ്ണമോഹൻ കെ പി ✍

വർണ്ണവിരാജിത ഭൂമീസുതന്മാർക്കു
വൈഭവം കൈവരുത്തീടുവാനായ്
വൈയാകരണന്മാരായി മാറ്റീടുവാൻ
വൈകാതെയെത്തീ വിശാഖം ഇന്ന്

വൻപുള്ള മാനുഷർ കേൾക്കാതെ പോകുന്ന
വൈഖരീനാദത്തെക്കേൾപ്പിക്കുവാൻ
വച്ചടിവച്ചടി കേറ്റം കൊടുക്കുവാൻ
വൻ മനസ്സോടെ വിശാഖ മെത്തീ…

വാദവും വാദ്യവും കൈകോർത്തു നില്ക്കുന്ന,
വാഗ്ദത്ത ഭൂമിയാം കേരളത്തിൻ
വാദ്യപ്പൊലിമയിൽ, വാദവിവാദങ്ങൾ
വായ്പോടെ മാറ്റാൻ വിശാഖമൂന്നീ

വാരണം, മാബലി, അത്തച്ചമയവും
വാരിജനേത്രൻ തൻ ഭാവങ്ങളും
വാരിപ്പുതപ്പിച്ചിതാ ചിങ്ങമാനസ-
വീഥി വിശാഖത്തെയാനയിപ്പൂ

വർദ്ധിത വീര്യത്തെയുൾക്കൊണ്ടു മാനുഷൻ
വൃദ്ധിയെക്കൈക്കൊണ്ടു നില്ക്കുമെന്നാൽ
വിശ്വം പ്രകാശത്താൽ പൂരിതമായിടും….
വശ്യതയോടേ വിശാഖമോതീ….

വാശിയുണ്ടെങ്കിലും, ദുർവാശിയാകൊലാ
വാശിപ്പുറത്തൊന്നും ചെയ്തു കൂടാ…
വാരിജനേത്രരാം മാനുഷന്മാർക്കത്രേ
വാസനയേകൂ, വിശാഖമെന്നും☂️