🍃ഉൾപ്പൊരുൾ🍃

രചന : വിദ്യാരാജീവ്.✍

നിനയ്ക്കുകിലൊറ്റയാനായീത്തുരുത്തിൽ;
വൃഥാ സമയം പോക്കുന്നുവെന്റെ ജന്മം.
എന്നിലെയോരോ വ്യഥകളേയും
പുഞ്ചിരിപ്പൂമാല്യങ്ങളാക്കി;
ജീവിതമാം പാഴ് വഞ്ചി തുഴയുന്ന
മാനവചിത്തത്തിൽ ചാർത്തിടട്ടേ;
അല്ലായ്കിലാലംബമില്ലാതെ
കാറ്റിലാടുന്ന ഒറ്റമരത്തണലിൽ;
ചേക്കേറാതെ ഋതുപ്പക്ഷികൾക്കൊപ്പം
കൂട്ടുകൂടി ദേശാന്തരങ്ങളിൽ സഞ്ചരിക്കട്ടേ.
അതുമല്ലെങ്കിൽ കഥകളും, കളികളുമായി
ചങ്ങാതിമാർക്കൊപ്പം ബാല്യത്തിലെപ്പോൽ,
പ്രിയമോടെ ഉല്ലസിച്ചിടട്ടേ!
അരുംകൊലചെയ്യുന്ന കിരാതന്മാരെ
ഉന്മൂലനാശം ചെയ്തിടട്ടേ;
പട്ടിണിയിൽ മുങ്ങിത്താഴുന്നവർക്ക്
കൈത്താങ്ങായി നിന്നിടട്ടേ.
പറയുകയെൻ തപ്തനിശ്വാസങ്ങളേ
സ്വാഗതം ചെയ്യുന്നു നിന്നെയെൻ,
ഉൾപ്പൊരുൾ തേടുവതിനായ്!
വ്യർത്ഥമായ് തീർക്കാതെ ഈയുള്ളവൻ
ജന്മസുകൃതം നേടി മണ്ണോട് ചേർന്നീടട്ടേ.