പുഴയും തീരവും

രചന : ശ്രീകുമാർ പെരിങ്ങാല✍

നദികൾ, പുഴകൾ, സാഗരതീരം
കഥപറയുന്നാക്കടവുകളും
കളകളമൊഴിയിൽ കളിവാക്കോതി
ചുംബനമേകുന്നോളങ്ങൾ.

അരയിൽച്ചുറ്റിപ്പുളകംകൊള്ളു-
ന്നരഞ്ഞാണച്ചരടെന്നതുപോൽ
വെള്ളിക്കൊലുസുകളിട്ടവളൊപ്പം
നൃത്തംചെയ്തു രമിക്കുന്നു.

പരിരക്ഷണമതുതുടരുംതീരം
വഴിവിട്ടവളൊന്നൊഴുകാതെ
പരിമിതിയുണ്ടവനെങ്കിലുമിവിടെ-
പ്പരിചരണത്തുണയായീടും.

എന്തൊരു രസമായുണ്ണികൾവന്നു
കളിച്ചു കുളിച്ചു കഴിഞ്ഞൊരുകാലം
എന്നാലിന്നതു മാറിയ ചിത്രം
കോലംകെട്ടൊരുപുഴയുടെ ചരിതം.

തസ്ക്കരമാനസർ വന്നുകുഴിച്ചി-
ന്നവളുടെ മാറുപിളർക്കുമ്പോൾ
വന്നുകനത്തിലു മാന്തിയമണ്ണും
കൊട്ടകണക്കിനു പോകുന്നു.

വണ്ടികൾ പലവഴിയെത്തുംകരയിൽ
മാന്തിയെടുക്കാൻ തടിനിതലം
ഈവിധമൊടുവിൽ പൊലിയുംജീവൻ
ചെറിയൊരുകാലം കഴിയുമ്പോൾ.

ദുർവിധിയല്ലിതു ക്രൂരതയല്ലോ
ദുരമൂത്തലയും മനുജാ! കേൾ
ഇല്ല തടുക്കാനാവില്ലാർക്കും
ഗതികെട്ടവളൊന്നാഞ്ഞീടിൽ.

ഒരുഹൃദയംപോലവരിനിയെന്നും
ഇണപിരിയാതിവിടുണ്ടാവാൻ
ചങ്കുതുരന്നുമുറിക്കാതിനിയും
ജീവൻ പാതി കൊടുത്തീടൂ..