🖤പുഴയുടെ നൊമ്പരങ്ങൾ🖤*

രചന : കൃഷ്ണമോഹൻ കെ പി ✍

ചിരിയോടെയടവിയിൽ പിറവിയെടുത്തൊരു
അരുവിയായ് മെല്ലെയുണർന്ന ഈ ഞാൻ
തരുനിര പിന്നിട്ടങ്ങൊഴുകാൻ തുടങ്ങവേ
തരമോടെയൊരു പാറ തടസ്സമായീ
നൊമ്പരപ്പൂവിന്റെ ഒന്നാമിതളായി
നിന്നൊരാപ്പാറ കടന്നുപോകാൻ
നന്നായ് ശ്രമിച്ചു ഞാൻ കാത്തിരിക്കുന്നേരം
നാലഞ്ചരുവികൾ കൂട്ടിനെത്തീ
ഒത്തുചേർന്നങ്ങനെ
പാറ കടന്നപ്പോൾ ഗർത്തത്തിൽ
വീണതും നൊമ്പരം താൻ
പതിയെ ഞാനൊരു ചെറു നദിയായി മാറിയീ
പരിധിയിലെത്തി, ഒഴുകി നീങ്ങീ
പട്ടണം തന്നിലെ പാഴ് വസ്തുവെല്ലാമെൻ
പാവന ദേഹത്തിലർപ്പിക്കുവോർ
പരിതാപമെന്നിലുണർത്തിയതുമെന്റെ
പരിഹാരമില്ലാത്ത നൊമ്പരമായ്
ഉയരവും താഴ്ചയും കണ്ടു ഞാനിങ്ങനെ
ഉലയും മനവുമായ് ഒഴുകിയെത്തീ
അലയടിച്ചീടുന്ന കടലിൽ പതിയ്ക്കുമ്പോൾ
അതിലെ ലവണവും നൊമ്പരമായ്🫂