🌹 സൗരയൂഥത്തിൽ ഒരു സൂര്യകാന്തി 🌹

രചന : തെന്നൂർ രാമചന്ദ്രൻ ✍️

എരിഞ്ഞടങ്ങാൻ നേരമായില്ല സൂര്യാ
തിരിഞ്ഞൊന്നുനോക്കൂ ആത്മകാരകാ നീ
പ്രരാഗവേദനാ ചിന്തനച്ചിന്തായി –
പ്രരോദനത്തീക്കുണ്ഡമാകല്ലെ സൂര്യാ

സ്വകാര്യമോതാൻ കാത്തുനിന്നോ കാമിനീ
പകച്ചു പോയോ പീതലാവണ്യ പുഷ്പം
തെളിച്ചം മുഖത്തുണ്ടെങ്കിലുമുൾത്തടം
നിറച്ചും മിടിച്ചേ നില്‌പൂ സൂര്യകാന്തി

നിലത്തു നോക്കാതെയൊട്ടും കുനിയാതെ
കരുത്തുകാട്ടും കൊതിക്കെറുവോ പ്രേമം
ജ്വലിച്ചു നിൽക്കും ജ്യോതിരാനന്ദമല്ലെ
ജപിച്ചു നിൽക്കും രാഗിണി സൂര്യകാന്തി

ഇതൾ വിടർത്തുമ്പോളാകാശ വ്യാപ്തിയിൽ
വൃത്തവിസ്മയം വിതയ്ക്കുന്ന ഭാവുകം
ഒരുക്കുന്നു പൂവേ അർക്കനോടൊത്തു നീ
തിരുക്കുറൽപ്പാട്ടിലെ രാഗവൈശാഖം

ഒരുത്തുംഗപ്രേമസാമ്രാട്ടിൻ കിരീടം
പവിത്രപ്രേമാർപ്പണപ്പരാഗമേൽക്കേ
സവിതുർവരേണ്യച്ചൊല്ലിനെപ്പുൽകുന്നു
അചിന്ത്യാനന്ദ സാന്ധ്യരാഗമേൽക്കുന്നു

അസംഖ്യാവർത്തനങ്ങളാൽ പരസ്പരം
അസന്നിഗ്ധമാക്കുന്നാശാ ബന്ധുരത്വം
ചിരിക്കാത്ത സൂര്യനെ വശീകരിക്കും
നിറക്കൂട്ടാണു നീ സൂര്യകാന്തിപ്പൂവേ.