സ്ത്രീകൾ ‘വായാടി’കൾ എന്നത് വെറുമൊരു നാട്ടുചൊല്ലാണോ അതോ അതിൽ ശാസ്ത്രീയമായ സത്യമുണ്ടോ?

രചന : വലിയശാല രാജു ✍

മനുഷ്യർക്കിടയിലെ സംസാരത്തെക്കുറിച്ച് പറയുമ്പോൾ ഏറ്റവും കൂടുതൽ കേൾക്കുന്ന ഒന്നാണ് ‘സ്ത്രീകൾ വാചാലരാണ്’ എന്നത്. പുരുഷന്മാരേക്കാൾ കൂടുതൽ വാക്കുകൾ സ്ത്രീകൾ ഒരു ദിവസം ഉപയോഗിക്കുന്നു എന്ന ധാരണയ്ക്ക് കാലപ്പഴക്കമുണ്ടെങ്കിലും, ആധുനിക ശാസ്ത്രം ഈ വിഷയത്തെ നോക്കിക്കാണുന്നത് രസകരമായ ചില നിരീക്ഷണങ്ങളിലൂടെയാണ്.

വാക്കുകളുടെ കണക്കിലെ കളി

ടെക്സസ് സർവ്വകലാശാലയിലെ മനഃശാസ്ത്രജ്ഞനായ ജെയിംസ് പെന്നിബേക്കർ നടത്തിയ പഠനങ്ങൾ ഈ വിഷയത്തിൽ വ്യക്തമായ ചില കണക്കുകൾ മുന്നോട്ടുവെക്കുന്നുണ്ട്. ഒരു ദിവസംശരാശരി സ്ത്രീകൾ 16,215 വാക്കുകൾ സംസാരിക്കുമ്പോൾ പുരുഷന്മാർ സംസാരിക്കുന്നത് 5,669 വാക്കുകളാണ്. അതായത്, വാക്കുകളുടെ എണ്ണത്തിൽ വലിയൊരു വ്യത്യാസം ശാസ്ത്രീയമായി കണ്ടെത്താൻ കഴിഞ്ഞിട്ടില്ല. സാഹചര്യങ്ങൾക്കനുസരിച്ച് രണ്ട് വിഭാഗവും ഒരുപോലെ സംസാരിക്കാറുണ്ട് എന്നതാണ് വാസ്തവം.

ജീവശാസ്ത്രപരമായ മുൻതൂക്കം

എങ്കിലും, സ്ത്രീകൾക്ക് സംസാരകാര്യത്തിൽ അല്പം മുൻതൂക്കമുണ്ടെന്ന് വാദിക്കുന്നവർക്ക് നിരത്താൻ ചില ശാസ്ത്രീയ തെളിവുകളുണ്ട്. അതിൽ പ്രധാനമാണ് FOXP2 എന്ന പ്രോട്ടീൻ. ഭാഷാപരമായ കഴിവുകളെയും സംസാരത്തെയും നിയന്ത്രിക്കുന്ന ഈ ‘ലാംഗ്വേജ് പ്രോട്ടീൻ’ സ്ത്രീകളുടെ തലച്ചോറിൽ പുരുഷന്മാരേക്കാൾ 30 ശതമാനം അധികമാണെന്ന് ചില പഠനങ്ങൾ ചൂണ്ടിക്കാട്ടുന്നു. പെൺകുട്ടികൾ ആൺകുട്ടികളേക്കാൾ വേഗത്തിൽ സംസാരിക്കാൻ തുടങ്ങുന്നതിനും ഭാഷ കൈകാര്യം ചെയ്യുന്നതിൽ മികവ് പുലർത്തുന്നതിനും പിന്നിലെ ഒരു കാരണം ഇതാണെന്ന് കരുതപ്പെടുന്നു.

‘റാപ്പോർട്ട് ടോക്കും’ ‘റിപ്പോർട്ട് ടോക്കും’

സംസാരത്തിന്റെ അളവിനേക്കാൾ അത് എന്തിനുവേണ്ടി ഉപയോഗിക്കുന്നു എന്നതിലാണ് പ്രധാന വ്യത്യാസം.
സ്ത്രീകൾ പലപ്പോഴും ആശയവിനിമയം നടത്തുന്നത് ബന്ധങ്ങൾ ദൃഢമാക്കാനും വികാരങ്ങൾ പങ്കുവെക്കാനുമാണ്. സാമൂഹികമായ ഇടപെടലുകൾക്ക് അവർ സംസാരത്തെ ഒരു പാലമായി ഉപയോഗിക്കുന്നു. ഇതാണ് റാപ്പോർട്ട് ടോക്ക് (Rapport Talk).
പുരുഷന്മാർ പലപ്പോഴും വിവരങ്ങൾ കൈമാറാനോ, തങ്ങളുടെ അറിവ് പ്രകടിപ്പിക്കാനോ അല്ലെങ്കിൽ ഒരു പ്രശ്നപരിഹാരത്തിനോ വേണ്ടിയാണ് സംസാരിക്കുന്നത്. ഔദ്യോഗിക ചർച്ചകളിലും മീറ്റിംഗുകളിലും പുരുഷന്മാർ കൂടുതൽ സംസാരിക്കുന്നതായി കാണുന്നത് ഇതുകൊണ്ടാണ്.ഇതാണ് റിപ്പോർട്ട് ടോക്ക് (Report Talk).

സ്ത്രീകൾ കൂടുതൽ സംസാരിക്കുന്നു എന്നത് ഒരു പരിധിവരെ ഒരു ‘സ്റ്റീരിയോടൈപ്പ്’ (Stereotype) ആണെങ്കിലും, ആശയവിനിമയത്തിലെ വൈവിധ്യവും വൈകാരികമായ ആഴവും പരിശോധിക്കുമ്പോൾ സ്ത്രീകൾ അല്പം മുന്നിലാണെന്ന് പറയാം. എന്നാൽ, സംസാരത്തിന്റെ അളവിനേക്കാൾ പ്രധാനം അത് കൈമാറുന്ന ആശയങ്ങളുടെ വ്യക്തതയും മൂല്യവുമാണ്. വ്യക്തിപരമായ സ്വഭാവവും സാഹചര്യങ്ങളും തന്നെയാണ് ആര് എത്ര സംസാരിക്കണം എന്ന് തീരുമാനിക്കുന്ന നിർണ്ണായക ഘടകങ്ങൾ.