🌹ചാരുത തന്നുടെ മൂർത്തിപ്രഭാവമേ!🙏

രചന : കൃഷ്ണമോഹൻ കെ പി ✍

ചേറിൽ തലപൂഴ്ത്തിയെന്നാകിലും സർഗ്ഗ
ചേതനയേകുന്ന കാർത്യായനീ …
ചാലേ മകയിരം നാളിൽ കൊടിയേറി
ചെമ്മേയാ ഉത്രത്തിൽ കൊടിയിറക്കം
ചാരുവാമേഴു കുളങ്ങളിലാറാടി
ചേർത്തലയ്ക്കുത്സവമേകുന്നവൾ
ചാരുതയേകുന്നു ജീവപഥങ്ങളിൽ
ചേതസ്വിയായമ്മ ചിരകാലവും
ചാമരം വീശുന്നു നിന്നുടെ മുന്നിലായ്
ചാരുതയോടെ, കാവുടയോൻ
ചൈതന്യമൂർത്തികൾ കൃഷ്ണശിവന്മാരും
ചാഞ്ചല്യമില്ലാതെ കൂടെ നില്പൂ
ചിത് പെരുമാളിൻ്റെ വാത്സല്യപാത്രമേ
ചിന്മയീ, നിന്നിൽ ഗണപതിയും
ചിന്താ വിഹീനനായ് കൂടെ മരുവുന്നു
ചന്തമെഴുന്ന ചെരാതു പോലെ
ചന്ദന ചർച്ചിത രാവുകളിൽ തവ
ചന്തത്തെക്കാണുന്നു ചന്ദ്ര ദേവൻ
ചുമ്മാതുറയും പടയണികൾക്കൊപ്പം
ചഞ്ചലയാകാതെ നില്ക്കുവോൾ നീ
ചാരുത തന്നുടെ മോഹപ്രതീകമേ…
ചൂട്ടു പടയണി കണ്ടും മനോജ്ഞമാം
ചാടുകൾ കണ്ടും ഭ്രമിച്ചു പോയീ
ചാരുതയേകുന്നു ചിന്തകൾക്കെന്നുമേ
ചായട്ടെ ഞാൻ നിൻ മടിയിലായി
ചേർത്തലയ്ക്കെന്നുമേ, ഐശ്വര്യദായകി
ചേതോഹരിയാകും കാർത്യായനീ ………

🙏🙏🙏