രചന : ബിന്ദു അരുവിപ്പുറം✍️.
ബാല്യമെൻ്റെയുൾത്തടത്തി-
ലോർമ്മയായ് തികട്ടവേ
മാനസം തുളുമ്പിടുന്നു
മധുരമായ് മനോജ്ഞമായ്.
തിരികെയൊന്നു വന്നിടാത്ത
നാളതാണതെങ്കിലും
നടനമാടി നിൽക്കയാണ-
തെൻ്റെ ചുറ്റുമെപ്പൊഴും!
കൂട്ടുകാരൊടൊത്തുകൂടി
നാട്ടകത്തിലെപ്പൊഴും
ആടിയോടി മധുരമായ്
ജീവിതം നുകർന്ന നാൾ
ഓർത്തിടുമ്പോളുള്ളമിന്നും
പൂത്തുലഞ്ഞു നിൽക്കയായ്!
വർണ്ണശലഭമായ് പറന്നു-
യർന്നുപോയ നാളുകൾ
കുളിരുതിർക്കും തെന്നലായെ-
ന്നുള്ളിലൊഴുകിടുന്നുവോ!
മാരിവിൽ നിറങ്ങളായി-
ട്ടിതൾ വിടർത്തും കനവുകൾ
കാൽച്ചിലമ്പണിഞ്ഞു മുന്നിൽ
നടനമാടിടുന്നുവോ!
മാഞ്ഞിടാത്ത ചിത്രമായ്
മാറിടുന്ന കാഴ്ച്ചകൾ
അമ്പിളിപ്പൂച്ചിരിയുമായ്
യെത്തിനോക്കിടുന്നുവോ!
കൊഞ്ചലും കിനാക്കളും
കുളിരിയന്ന സ്നേഹവും….
നഷ്ടസ്വപ്നമെന്നപോലെ
മാഞ്ഞകന്നു പോകുമോ?
അകലുവാൻ കഴിഞ്ഞിടാതെ
മണിചിതറും മൊഴികളും
മധുകണങ്ങളെന്നപോലെ
മനമൊഴിഞ്ഞു നിൽക്കുമോ?