🎻 വരികളെത്തുന്ന വഴിയിലൂടെ🎻

രചന : കൃഷ്ണമോഹൻ കെ പി ✍️

എന്തിനീ സ്വരങ്ങളെൻ
സങ്കല്പ സീമ തന്നിൽ,
പദ നിർഝരിയായി വിരുന്നു വന്നൂ ……
എന്തിനാ പദങ്ങളെൻ
ഉള്ളത്തിനുള്ളിലുള്ള,
ചേതന,വരികളായ് പകർത്തിവയ്പൂ ……
ഞാനെന്നും തേടിടുന്ന രാഗപരാഗങ്ങൾ, തൻ ,
സംഗീതമവരെന്തേ, ഉണർത്തിടുന്നു
അറിയില്ലയെനിയ്ക്കൊന്നും
അജ്ഞാത ശക്തി മെല്ലെ
വിരലിന്മേലേറി വന്നു കുറിക്കുന്നുവോ………
എൻ മനോവ്യാപാരങ്ങൾ
അക്ഷരനക്ഷത്രമായ്, …..
ഇങ്ങനെ താളിതിന്മേൽ,
വിരിഞ്ഞിടുമ്പോൾ …..
ഞാനെന്ന നിസ്സാരനോ,
സന്തോഷവീചി മൂളും,
സാ..മഗാനം , കേട്ടു തരിച്ചു നില്പൂ…….🌹