🌱പുതുവർഷം,പുഞ്ചിരിയോടെ🌱

രചന : കൃഷ്ണമോഹൻ കെ പി ✍️

വത്സരം തുടങ്ങുന്നൂ, കൈതപ്പൂ മണമോടെ,
വാസരം തുടിയ്ക്കുന്നൂ, പ്രാർത്ഥനാ ഭരിതമായ് …….
വന്നെത്തും വർഷത്തെ നാം ഹർഷത്തോടെ കാണാം,
വർണ്ണിക്കാൻ സന്തോഷങ്ങൾ ഒരുപാടു നല്കീടട്ടേ……..
രാമായണമാസം പിന്നിട്ട നേരത്തെത്തി,
രമണീയതയേകും, ചിങ്ങമേ നമസ്ക്കാരം
രാവുകൾ മറഞ്ഞല്ലോ, പുതു പുതു വെളിച്ചത്തിൻ
രാഗവിസ്മയം തീർത്തങ്ങോണവുമണയുന്നു
ജന്മജന്മാന്തരങ്ങൾ ചൂടും ഭാവനാ സമുദ്രത്തിൽ
ജലനിസ്വനമായി വന്നെത്തും വസന്തങ്ങൾ
ജാലകം തുറക്കുന്നൂ, ജ്ഞാനാജ്ഞാനങ്ങളെ
ജീവിതനിമിഷത്തിൽ കാട്ടുവാനായി മാത്രം
അജ്ഞാത സമുദ്രത്തിൻ തീരത്തു നമ്മൾ കാണും……
അതിലോല സ്വപ്നങ്ങൾ തൻ ചിറകുകൾ വിടർത്തിയാൽ
അറിയാതെ വന്നെത്തുന്ന നിമിഷകണങ്ങൾ പോലും
അണിയിപ്പൂ മനുഷ്യനെ പ്രത്യാശാ , നവമാല്യം ……..
ആകയാൽ, സർവർക്കുമായ് ഏകുവാൻ മുതിരുന്നൂ
ഹായ്, ചിങ്ങപ്പിറവിയിൽ, പുതുവത്സരാശംസകൾ🌹