🌴 കേരളപ്പിറവിദിനാശംസകൾ 🌴 ഒഴുകൂ..മലയാളമേ..🌴

രചന : അൻവർ ഷാ ഉമയനല്ലൂർ✍️

കുളിരരുവിപോലൊഴുകിവന്നെന്റെയുള്ളിലായ്
ഒരു ഗ്രാമ്യകാവ്യം രചിക്ക മലയാളമേ,
ചിരരുചിര ചിന്താമലരുകൾക്കുള്ളിൽ നിൻ
സ്മരണാമരന്ദം നിറയ്ക്കുകെൻ പുണ്യമേ..

നവ മകൾമുകുളങ്ങൾക്കെങ്കിലും നുകരുവാൻ
കനിവോടെ കാത്തിടുന്നെൻ മാതൃഭാഷയെ,
പടികടന്നരികെ യിന്നണയുമീ പുലരിപോൽ
നവജാതർ നുകരട്ടെ സുരസൗമ്യ നന്മയെ.

തെളിവാർന്ന തലമുറകൾവന്നു മുറിയാതെ-
യാലപിച്ചഴകേറ്റിടട്ടെയെൻ ഭാഷയെ.
പുലരൊളിക്കിടയിലൂടൊഴുകുമീ വരികളിൽ
തിരുരവ സാന്നിദ്ധ്യമറിയുന്നപാരതേ.

പതിവുപോൽ ഞങ്ങൾക്കു നൽകുനീ മനതാരിൽ
ഗ്രാമീണയീണങ്ങളിഴചേർന്ന നിൻമൊഴി,
വെറുതെയൊന്നാലപിച്ചീടവേ, ചൊടികളിൽ
കരുതിവച്ചീടുന്ന മലയാളവരമൊഴി.

കവിതതൻ കതിരായി നിൽക്കുവാനനുദിനം
കനിവിന്നിതര ചിത്തങ്ങളുണർത്തിടാൻ
കാലമൊരു പുഴപോലെയതി സൗമ്യമായ് പുതിയ
ഗീതങ്ങൾ മധുരമായാലപിച്ചീടുവാൻ

ഇഴപിരിയാതകം കാത്തുകൊണ്ടൊരുമതൻ
സ്വരമലർ മാത്രം വിരിയിച്ച മണ്ണിതിൽ
രചനാവഴികളിൽ തണലായി; ഭാഷതൻ-
മഹിതാലയങ്ങൾ പണിയിച്ചിടങ്ങളിൽ

കാവ്യമാം കരുതൽ വിളക്കുതെളിയി,ച്ചവർ;
പുലർകാലമായ ലങ്കാരങ്ങളായ് ച്ചിലർ
നിശ്ചയം! നൽക്കാവ്യ ശുഭ ചിന്തയാൽ സുതർ
കനിവിന്നരുവിപോലൊഴുകിയീ മണ്ണിതിൽ.

സ്മരണയിൽ മാത്രമൊതുങ്ങാതെൻ ഭാഷയെ,
തിരിയിട്ടുതെളിയിക്ക! മലയാള ദേശമേ.
കാവ്യാങ്കണത്തിൽ തളിർത്ത മുകുളങ്ങൾ പോൽ
പകരാൻകൊതിപ്പൂ; സുഗന്ധ മലയാളമേ.

സ്ഥിതിമാറിയിപ്പൊഴാ, നിഴൽ മാത്രമാകയാൽ
മിഴിതെളിച്ചീടാൻ കുറിച്ചിടുന്നെൻ മൊഴി,
കരുതി നിന്നീടുകിന്നിവിടെ-യെന്നോതുവാൻ
തേടുന്നു വായനാദീപങ്ങൾതൻ തിരി.

രുചിക്കുന്ന മാത്രയി,ലൊരിക്കലെൻ കൈരളി
തിരക്കീടുമീ ലളിത കാവ്യ പൊരുളിൻ വഴി,
പുഴ തഴുകിയൊഴുകീടുമെന്നപോൽ കൗമുദി
പകരുമ,ന്നകതാരി,ലെൻ ഗ്രാമ്യതേൻ മൊഴി.
🌴

കുളിരരുവിപോലൊഴുകി വന്നെന്റെയുള്ളിലായ്
ഒരു ഗ്രാമ്യ കാവ്യം രചിക്ക മലയാളമേ,
ചിരരുചിര ചിന്താ മലരുകൾക്കുള്ളിൽ നിൻ
സ്മരണാമരന്ദം നിറയ്ക്കുകെൻ പുണ്യമേ.

കൈരളീപുത്രരായാരമ്യ ജീവിതം
ഈവിധമേകിയോരാദിത്യചിന്തകം
നൽകിയീദേശത്തിനതിഹൃദ്യ ഭൂപടം
അഴകാർന്നതാം ഹരിത മലയാള ഭൂതലം.

കേരളപ്പിറവി തന്നാഘോഷസുദിനമേ,
സ്മരണീയ കരുണാർദ്ര ദേശപ്രദീപമേ,
അണയാതെ കാക്കുമീയാർദ്രമാം സ്നേഹകം
അഭിമാനമേ, ഞങ്ങളേകുന്നൊരാദരം.🙏💖