രചന : അനിൽ മാത്യു ✍
ആദിയിൽ
സുക്കർബർഗിന്
ഒരു കമ്പ്യൂട്ടറും,
അഗാധമായ അറിവും,
ലോകത്തെ പരസ്പരം
ബന്ധിപ്പിക്കാനുള്ള
ഒരു അദമ്യമായ
ആഗ്രഹവുമുണ്ടായിരുന്നു.
എന്നാൽ, ഈ
ഡിജിറ്റൽ ലോകം
രൂപമില്ലാത്തതും
ശൂന്യവുമായിരുന്നു.
ആളുകൾ പരസ്പരം
അകന്നും
ഒറ്റപ്പെട്ടുമിരുന്നു.
ഒന്നാം ദിവസം :
സുക്കർ ബർഗ് തന്റെ
കമ്പ്യൂട്ടർ തുറന്നു.
“ഇവിടെ ഒരു പ്ലാറ്റ്ഫോം
ഉണ്ടാക്കട്ടെ’ എന്നവൻ
മനസ്സിൽ പറഞ്ഞു.
അവൻ കോഡിന്റെ
ആദ്യ വരികൾ എഴുതി.
ആ കോഡാണ്
ഇരുണ്ട ഡിജിറ്റൽ
ലോകത്തിലെ ആദ്യത്തെ
വെളിച്ചം.
അവൻ ആ വെളിച്ചത്തെ ഓൺലൈൻ
ലോകമെന്ന് വിളിച്ചു.
ഇരുട്ടിനെ ഓഫ്ലൈൻ
ലോകമെന്നും
വേർതിരിച്ചു.
രണ്ടാം ദിവസം :
രണ്ടാം ദിവസം
അവൻ “നെറ്റ്വർക്കിംഗ് ഇൻഫ്രാസ്ട്രക്ചർ”
എന്ന ഒരു ഡാറ്റാബേസ്
സ്ഥാപിച്ചു.
ഇത് വിവരങ്ങളെയും
കണക്ഷനുകളെയും
വേർതിരിക്കുന്ന
ഡിജിറ്റൽ ‘ആകാശം’
ആയിരുന്നു.
അവൻ അതിനെ
സെർവർ എന്ന് വിളിച്ചു.
മൂന്നാം ദിവസം :
മൂന്നാം ദിവസം
അവൻ ഒരു വെബ്സൈറ്റിന്
രൂപം നൽകി.
അവൻ പേജുകൾ നിർമിച്ചു.
‘പ്രൊഫൈലുകൾ’ എന്ന്
അവയ്ക്ക് പേരിട്ടു.
ആളുകൾക്ക് അവരുടെ
ചിത്രങ്ങളും വിവരങ്ങളും
നൽകാനുള്ള സ്ഥലം
അവൻ ഉണ്ടാക്കി.
അവൻ വാൾ ഉണ്ടാക്കി.
അതായിരുന്നു ആളുകൾക്ക്
അവരുടെ ചിന്തകളും
സ്റ്റാറ്റസുകളും
പോസ്റ്റ് ചെയ്യാൻ
സാധിക്കുന്ന ഇടം.
അവൻ ന്യൂസ്ഫീഡ്
ഉണ്ടാക്കി.
അവിടെ പുതിയ പുതിയ
വിവരങ്ങൾ ഒഴുകിയെത്തി.
അവൻ കണ്ടു.
അത് നല്ലത് എന്ന്
മനസ്സിലാക്കി.
നാലാം ദിവസം :
നാലാം ദിവസം
അവൻ തന്റെ പ്ലാറ്റ്ഫോമിൽ
വിഷ്വൽ കണ്ടന്റുകൾക്ക്
ഇടം നൽകി.
അവൻ ചിത്രങ്ങളെയും
വീഡിയോകളെയും
നിയന്ത്രിക്കുന്ന
അൽഗോരിതങ്ങൾ
ഉണ്ടാക്കി.
അവൻ ലൈക്ക്
ബട്ടൺ ഉണ്ടാക്കി
അത് ഡിജിറ്റൽ ലോകത്ത്
വെളിച്ചം നൽകുന്ന
നക്ഷത്രങ്ങൾ പോലെ
ആയിരുന്നു.
അവൻ സോഷ്യൽ മീഡിയ
ടൂളുകൾ ഉണ്ടാക്കി.
അവ ഓൺലൈൻ
ലോകത്ത് ആളുകളുടെ
ശ്രദ്ധയാകർഷിച്ചു.
അഞ്ചാം ദിവസം:
അഞ്ചാം ദിവസം
പ്ലാറ്റ്ഫോം
@ഉപയോക്താക്കളാൽ
നിറയാൻ തുടങ്ങി.
അവൻ ‘ഫ്രണ്ട് റിക്വസ്റ്റ്’
എന്ന ഓപ്ഷൻ ഉണ്ടാക്കി.
അതുവഴി ആളുകൾ
പരസ്പരം കണക്ട്
ചെയ്യാൻ തുടങ്ങി.
പോസ്റ്റുകളും കമന്റുകളും
മെസ്സേജുകളും എന്ന
ഡിജിറ്റൽ കണക്ഷൻ
അവനുണ്ടാക്കി.
സോഷ്യൽ നെറ്റ്വർക്കുകൾ
വർധിക്കട്ടെ എന്ന് അവൻ
പറഞ്ഞു.
അങ്ങനെ സംഭവിച്ചു.
സന്ധ്യയായി ഉഷസ്സുമായി
ആറാം ദിവസം:
ആറാം ദിവസം അവൻ
തന്റെ ഏറ്റവും പ്രധാനപ്പെട്ട
സൃഷ്ടിയിലേക്ക് തിരിഞ്ഞു.
അവൻ ഓരോ
ഉപയോക്താവിനും
നിയന്ത്രണാധികാരം
നൽകി..അവരുടെ
പ്രൊഫൈലിന്മേലും
അവർ പോസ്റ്റ് ചെയ്യുന്ന
വിവരങ്ങൾക്ക് മേലും.
അവൻ പറഞ്ഞു..
നിങ്ങൾ ഈ ഡിജിറ്റൽ
ലോകത്ത് ഫോട്ടോകൾ
പോസ്റ്റ് ചെയ്യുകയും
സുഹൃത്തുക്കളെ
കൂട്ടുകയും, കണ്ടന്റുകൾ
പങ്കുവെക്കുകയും ചെയ്യുക.
അങ്ങനെ,അവസാനത്തെ
ജോലിയും പൂർത്തിയായി.
‘ഫേസ്ബുക്ക്’ ലോകത്ത്
അവതരിച്ചു.
അവൻ കണ്ടു..താൻ
ഉണ്ടാക്കിയതെല്ലാം വളരെ
നല്ലതായിരുന്നു.
ഏഴാം ദിവസം:
ഏഴാം ദിവസം സുക്കർ
തന്റെ സൃഷ്ടിയുടെ
‘ലോഞ്ച്’ ആഘോഷിച്ചു.
അവൻ തൻ്റെ കമ്പ്യൂട്ടർ
അടച്ചു വെച്ച് വിശ്രമിച്ചു.
