👑സന്മനസ്സുള്ളവർക്ക് സമാധാനം⭐

രചന : അൻവർ ഷാ ഉമയനല്ലൂർ ✍

നക്ഷത്രമായിത്തിളങ്ങും മഹാ രമ്യ-
സമയം മലർസ്മിതാനന്ദ പ്രകാശിതം
ഹൃദയ സൗന്ദര്യമായുണരും പ്രഭാതമേ,
പ്രിയതരമായിതേനാശീർവദിക്കുന്നു.

തിരുഹർഷ വദനസ്മിതമായി മാറിയെൻ
കരളിൽത്തുളുമ്പുന്നനുഗ്രഹാശംസകൾ
പാരിന്നധിപതേ, വാഴ്ത്തുന്നെളിമതൻ
തെളിനീർപ്പുഴകളായ്; മനസ്സിലാ, നന്മകൾ.

ബേത്.ലഹേം രത്നവെളിച്ചമായീദിനം
പ്രിയരമ്യ ഗീതമായുണരുന്നു യുവജനം
ഉഷസ്സിനും മനസ്സിനുമുന്മേഷ,മാദരം
വർണ്ണാഭമായിത്തിളങ്ങുന്നു താരകം.

മൃദു വദനകാവ്യമായുണരുന്ന സുസ്മിതം
ഉൾത്തുടിപ്പോടുണർത്തുന്നില്ലെ നിന്നകം
മാലാഖമാരാലപിക്കുന്നു ഗീതകം;
മാതാപിതാക്കൾതൻ കരുണാർദ്ര ഹൃദയകം.

വാഴ്ത്തിനുകരുന്നു നാം പരിമളത്തിൻ സുഖം
കരളിലായുണരുന്നുപുലരിതന്നരുമയും
ഹൃദയസ്തുതികളാൽ പാരിന്നു മുഖരിതം
പുണ്യമേ,യതി ലോലമായെത്ര കാവ്യകം.

വിണ്ണിൻ വെളിച്ചവും മണ്ണിൻ മഹത്വവും
മാതൃകാഹൃദയങ്ങൾക്കേകുന്നു സാന്ത്വനം
മാനവലോകമേ, വാഴ്ത്തുന്നു പുലരിയും
പാരിൻ വെളിച്ചമേ,യാരാമമാകെയും.

കാരിരുമ്പാകുന്ന ഹൃദയങ്ങളാകിലും
നേരിൻ വിശുദ്ധിയാലലിയുന്നു; സാദരം,
പാരാവാരമാ,ണാ,സ്നേഹസൗമ്യകം;
ശാന്തമാക്കുന്നഭയഗീതമായാ,മനം.

കാരുണ്യഹൃദയമേ,യീലോകമനുദിനം
വാഴ്ത്തുന്നുണർവ്വിൻ നിലാമഴയാകുന്നു;
പുലരിപോലൊന്നായ്ത്തിളങ്ങുന്നു കരളിനാൽ
നേരുന്നുണർവ്വിന്റെ ക്രിസ്മസ്സാശംസകൾ.🌹