🌝തിരുവാതിര🌝

രചന : ചന്ദ്രിക രാമൻ പാത്രമംഗലം ✍

വാനിൻ കിഴക്കായ് തെളിഞ്ഞ പ്രഭാകരൻ
പശ്ചിമതീരമണഞ്ഞിന്നു സന്ധ്യയായ്!
തീറ്റയും തേടിപ്പറന്ന പറവകൾ
തിരികെ തൻ കൂടണയുന്നൊരു വേളയായ് !

വെൺമേഘജാലങ്ങൾ, തീജ്വാലയേറ്റപോൽ
ചെമ്മാനമാറിലൂടോടിമറകയായ്
സന്ധ്യതൻ മാറിലെ വെൺസൂനജാലവും
അന്തിപ്പരിമളവാതിൽ തുറക്കയായ് !

പാതിരാപൂക്കളും വാനിൽ വിതറിയാ
സൂര്യനും സാഗരച്ചോപ്പിൽ മറഞ്ഞിതാ ,
ആയിരമായിരം പൊൻതാരകപ്പൂക്കളാ-
കാശവാടിയിൽ പൂത്തു വിടർന്നിതാ !

ആനന്ദപൂർണ്ണമാം കാഴ്ച്ചയൊരുക്കിയാ
ആതിരച്ചന്ദ്രനും മിന്നിത്തെളിഞ്ഞിതാ ,
പാതിരപ്പൂ ചൂടി നിൽക്കുവാനാതിര
പാൽനിലാകോടിയുടുത്തൊരുങ്ങുന്നിതാ !

പൂർണ്ണേന്ദുവാകുമാ വാൽക്കണ്ണാടി, തൻ
കൈകളിൽ ഭദ്രം മുറുക്കിപ്പിടിച്ചവൾ
പത്തു പുഷ്പങ്ങളും ചൂടിയൊരുങ്ങുവാൻ,
മംഗലയാതിര പാടിക്കളിക്കുവാൻ,

മങ്കമാർ മുറ്റത്തു കൂടിടും വേളയിൽ,
കുളിരാർന്ന കാറ്റിൻ ചിറകേറിവന്നിതാ !
കുരവയിട്ടാ, മങ്കമാർക്കൊപ്പമാതിര
ചുവടുകൾക്കൊത്തു കൈകൊട്ടിക്കളിച്ചിതാ !

പുലർകോഴി കൂകുന്ന വേളയായെങ്കിലും
പുള്ളുകൾ ,പാടിത്തളർന്നു പോയെങ്കിലുo
തളരാതുറക്കം മറന്നൊരാ മങ്കമാർ-
ക്കൊപ്പം കളിയ്ക്കുന്നു പൊൻതിരുവാതിര !
🌝🌝🌝