😳 കാമം വിജയി ഭവ😳

രചന : ഹരി കുങ്കുമത്ത്. ✍️

ഛേദിച്ച മൂക്കും മുലകളുമായ് വന്നു
നിൽക്കുന്ന പെങ്ങളെ കാണുന്നു രാവണൻ!
നാളേക്കിതേമട്ടൊരാൾ വന്നു തന്നെയും
ഭസ്മാന്തമാക്കുമെന്നോർത്തു സംഭീതനായ്!
തെക്കുവടക്കു നടന്നു സംഭ്രാന്തനായ്
മെത്തപ്പുറത്തെത്ര നിദ്രാവിഹീനനായ്!
കാമാർത്തിയാണയാൾക്കുള്ള ദിവ്യൗഷധ –
മെന്നേ നിനച്ചു മഹാകവി വാല്മീകി.
(പെണ്ണിനെ പുൽകാൻ തുടിക്കും മനസ്സൊരു
വൻകോട്ട പോലെത്തടഞ്ഞിടാം ഭീതിയെ!)
പോകുന്നു സന്യാസ രൂപത്തിൽ, സീതയെ
തേടിപ്പിടിച്ചു കടത്തുന്നു ലങ്കയിൽ!
പിന്നത്തെ രാപകലോരോ മനോരാജ്യ
രംഗങ്ങളിൽ വീണു നാൾകൾ കഴിക്കയായ്!
മക്കളെ സൈന്യത്തെ ബാന്ധവ വർഗത്തെ
മൊത്തം വെടിഞ്ഞിട്ടുമുള്ളിൽ തിടംവച്ചു
നിൽപ്പുണ്ടു വൈദേഹിയാം മനോമോഹിനി!
കഷ്ടം, ശരിക്കു കാമാരി തൻ ഭക്തനെ
കത്തിച്ചെരിച്ചതോ കാമ പ്രചണ്ഡത!!
കാമാരി =ശിവൻ.
പ്രചണ്ഡത = അത്യന്തം കോപിച്ചിരിക്കുന്ന അവസ്ഥ.
പരമശിവനെ പ്രത്യക്ഷമാക്കിയവനാണ് രാവണൻ. ചന്ദ്രഹാസം അങ്ങനെ ലഭിച്ചആയുധമാണ്. പക്ഷെ അരൂപിയായ കാമൻ പ്രതികാരം ചെയ്തു. ദേവന്റെ ശക്തനായ ഭക്തനിൽ അതിരു കടന്ന കാമത്തെ വിരുന്നൂട്ടി സർവ്വനാശംവരുത്തി..😂