യുദ്ധം

രചന : കെ എം മുസ്‌തഫ ✍️

യുദ്ധം
ഞാനും നീയും തമ്മിലല്ല,
എൻ്റെയുള്ളിലെ ഞാനും
നിൻ്റെയുള്ളിലെ ഞാനും
തമ്മിലാണ്!
അതിരുകൾ ഭേദിച്ച്
കടലും കാറ്റുമെന്നപോൽ
നമ്മുടെ ഉടലും മനസ്സും
പടരാൻ തുടിക്കുമ്പോൾ;
കൂരിരുളിലൊരു കുടുസ്സുമുറിയിൽ,
കനിവില്ലാത്തൊരാത്മരതിയുടെ കെടാകനലിൽ
വിനാശമായ് പൊട്ടിത്തെറിക്കാൻ
വെറിപൂണ്ട് നിൽപ്പുണ്ടാ ഞാനും ഞാനും
നോക്ക്,
ഈ യുദ്ധം നമ്മൾ
തമ്മിലല്ല;
പക്ഷെ അത് നമ്മുടെ ആകാശങ്ങളെയാണ്
പുകച്ച് തുപ്പുന്നത്!
നമ്മുടെ സ്വാതന്ത്ര്യ സ്വപ്നങ്ങളുടെ
ചിറകുകളാണ് കരിച്ചുകളയുന്നത്!
നമ്മൾ പുണർന്നുണർന്ന
മണ്ണിൻ മാറിലാണ്
നിണച്ചാലുകൾ ചീന്തുന്നത്!
അശാന്തിയുടെ
തീനാളങ്ങളെരിയുമടുപ്പിൽ
നമ്മുടെ കുഞ്ഞുങ്ങളെയാണ്
ചുട്ട് തിന്നുന്നത്!
ഈ യുദ്ധത്തിൽ
ഞാനും ഞാനുമൊരിക്കലും മരിച്ചൊടുങ്ങില്ല;
പക്ഷേ നമ്മൾ നമ്മളിൽനിന്നെന്നേക്കുമായ്
നാമാവശേഷരാകും!
ഞാൻ ഞാനിൽ
മദംപൊട്ടിയൊരാത്മരതി-
മൂർച്ഛയിൽ,
വെള്ളരിപ്രാവുകൾ
ആത്മാഹുതി ചെയ്ത
ആകാശത്തുനിന്ന്
ഇലപോലും മുളക്കാത്ത മണ്ണിൽ
ഒടുവിലൊരുനാൾ
കറുത്ത മഴകൾ
ആർത്ത് പെയ്യും!
അശാന്തിയുടെ വിഷവിത്തുകൾ
വീണ്ടും ഭൂമിയിൽ മുളച്ചുപൊന്തും…