രചന : റഹീസ് മുണ്ടക്കര ✍️
കണക്കുപുസ്തകം തുറന്നു വെച്ച്
സാത്താൻ പോലും വിയർക്കുന്നുണ്ട്,
അവനിലും വലിയൊരു ‘സാത്താൻ’
മണ്ണിൽ അവതരിച്ചതറിഞ്ഞ്!
പണ്ട്, കുരുതികൊടുത്തത്
കറുത്ത ആടിനെയായിരുന്നുവെങ്കിൽ
ഇന്ന്, നിങ്ങൾ അറുത്തതത്രയും
വെളിച്ചത്തെയായിരുന്നു.
നേര് ഒരു മൂലയിൽ ചുരുണ്ടുകൂടുന്നു
ചോരയുടെ മണം സഹിക്കാനാവാതെ;
നേരറിയുന്നവൻ നാവു മുറിച്ചു മാറ്റി
ഇരുളിൽ അഭയം തേടുന്നു.
സാത്താൻ പ്രഭയാൽ കണ്ണഞ്ചിയവർ
പിച്ചിച്ചീന്തുന്നത് ഉടലുകളല്ല,
നാളെയുടെ സൂര്യനെയാണ്.
ഇരുട്ടിന്റെ രാജകുമാരൻ പോലും
നിങ്ങളുടെ മുന്നിൽ തോറ്റുപോയിരിക്കുന്നു!
ഈ ചോരക്കളി കണ്ടിട്ട്…
“പണ്ട് വെളിച്ചത്തെ സ്നേഹിച്ചവർ ഇന്ന് ഇരുളിൽ ഒളിക്കുന്നു. കാരണം, ചോരയുടെ മണമുള്ള ഈ സാത്താൻ പ്രഭയിൽ സത്യം പറയുന്നവന്റെ നാവാണ് ആദ്യം അറുക്കപ്പെടുന്നത്.”
”നേരും നേരറിയുന്നവരും ഇന്ന് ഇരുട്ടിനെ പ്രണയിച്ചു തുടങ്ങിയിരിക്കുന്നു. പുറത്തെ വെളിച്ചത്തിന് മരണത്തിന്റെ നിറമാണെന്ന് അവർ തിരിച്ചറിഞ്ഞിരിക്കുന്നു.”
”സാത്താനെ പ്രീതിപ്പെടുത്താൻ നിങ്ങൾ ഒഴുക്കിയ ചോര കണ്ട് സാത്താൻ പോലും പറഞ്ഞു: ‘മതി, മനുഷ്യന്റെ ക്രൂരതയ്ക്ക് മുന്നിൽ ഞാൻ തോറ്റിരിക്കുന്നു!'”
𝓻𝓪𝓱𝓮𝓮𝓼…