🖤തകർന്ന ഹൃദയസ്വപ്നങ്ങൾ..

രചന : അൻവർ ഷാ ഉമയനല്ലൂർ ✍️

കഴിഞ്ഞ ദിവസം [21-04-2026] തൃശൂരിലുണ്ടായ വെടിക്കെട്ട്ദുരന്തത്തിൽപ്പൊലിഞ്ഞ പ്രിയ സഹോദരങ്ങൾക്ക് കണ്ണീർ പ്രണാമം – 🌹ഹൃദയാഞ്ജലി🙏

ക്ഷണനേരമാ,വർണ്ണ ഗ്രാമമിരുണ്ടുപോയ്
യുവസ്വപ്നഹൃദയങ്ങളൊന്നായ്ത്തകർന്നുപോയ്
കരളിലൊരു കനകവർണ്ണത്തിൻ കിനാക്കളാ,
മണ്ണിൽ മടങ്ങിടുന്നാർദ്രമായീ ദിനം.
കരയുവാൻ കണ്ണുനീരില്ലെന്റെ ഹൃദയമേ,
യിരുൾമൂടിനിൽക്കുന്നകമെയീ,ദുരിതവും
വെൺമയായണിയിച്ചൊരുക്കുന്നു, ദേഹവും
കഠിനവേനൽപ്പുതച്ചവസാന യാത്രയും.
വിറകൊണ്ടൊരുഗ്രശബ്ദത്തിൻ സമാപ്തിയിൽ
ചിറകറ്റുപോയെത്ര ഗ്രാമീണ യുവതകൾ
മറയുന്നതെന്തുനീ,യുലകിൻ വെളിച്ചമേ,
നിറമറ്റുപോയിതാ,യഴലാർന്ന ദുർദ്ദിനം.
ചേതനയറ്റപോലിന്നിതാ ഗ്രാമ്യകം
ചേർത്തണയ്ക്കാൻ മടിക്കുന്നു നിൻ നെഞ്ചകം
കേരളദേശമേ നിൻ സ്നേഹദർശനം
മാതൃകയേവമെന്നാൽ ഹൃദയഭേദകം.
മാതൃഹൃദയത്തിൻ വിലാപമായ്.,യാതനാ-
ലോകമാ,കുങ്കുമക്കുറിമായ്ച്ചനന്തരം
പിഞ്ചുഹൃദയങ്ങൾത്തകർന്നില്ലെ, സാദരം
വേദനയോടെ വിലപിക്കുന്നു കേരളം.
സ്നേഹിതലോകമേ,യാരിവർക്കാശ്രയം
മാനവഹൃദയങ്ങളുണരട്ടെ സന്തതം
മഹനീയ പൈതൃകം കാത്തുകൊണ്ടൊരുമൻ
കരളുമായ് കനലണച്ചീടാൻ ശ്രമിച്ചിടാം.
പ്രാർത്ഥനാമന്ത്രമാകട്ടെ നിൻ ഹൃത്തടം
തീർത്ഥമായേവം തളിക്കട്ടെ സ്നേഹകം
വ്യർത്ഥമാകാതിരിക്കട്ടെയാ,ദൈന്യകം
വേദനാനിർഭരം കദനാർദ്രസാഗരം.
വേണം പുനർചിന്തനം ദുരിത വീഥിയിൽ
വേപഥുകൊള്ളുന്നഭയമറ്റായിരം
മാനവ നന്മോദയത്തിൻ പ്രഭാമയം
ശാന്തിപകരട്ടെയാ, ഗ്രാമ്യഹൃദയത്തിനും..

💖🌷💖🌷💖🌷💖